Երկրապահը կդառնա՞ ապառազմականացված կառույց. Սասուն Միքայելյանի պատասխանը

ԵԿՄ 12-րդ արտահերթ համագումարից հետո կարճ ժամանակահատվածում մենք կարողացան համախմբել Երկրապահը, մաքրել երկրապահի շարքերը եւ կամաց-կամաց գնալ դեպի արմատներ: Այս մասին Վազգեն Սարգսյանի ծննդյան 61-ամյակի առիթով ԵԿՄ-ում միջոցառման ժամանակ հայտրարեց ԵԿՄ նախագահ Սասուն Միքայելյանը:

Միքայելյանի խոսքով, այսօր դա հնարավորինս հաջողվել է, իրենք շարունակում են ընթանալ այդ ուղղությամբ եւ ցանկանում են այդ գործը տանել դեպի փայլուն ավարտ:

Տեղեկացնելով, որ ներկա է Երկրապահ կամավորականների միության ամբողջ վարչությունը, մարզային նախագահները, փոխնախագահները, տարածքային բաժանմունքների նախագահները, ԵԿՄ նախագահն ասաց, որ իրենց են միացել նաեւ այն հասարակական կազմակերպությունները, որոնք պատերազմի հետ առնչվել էին:

Խոսքը «Մեծն Տիգրան» աշխարհազորային գնդի, «Արաբո» ջոկատի, «Հաշմանդամ օդաչուներ» ՀԿ-ի, Աֆղանցիներ կամավորական ջոկատի եւ «Դիրքապահ» Քառօրյա պատերազմի մասնակիցների միավորման մասին է: Միքայելյանն ասաց, որ այդ բոլոր կազմակերպություններից ընդգրկվել են վարչության կազմում. «կամաց-կամաց ավելի են ընդլայնում ԵԿՄ շարքերը»:

«Մենք գիտակցում ենք այսօրվա խոշոր տերությունների վերադասավորումները, որ տեղի են ունենում մեր տարածաշրջանում, եւ մենք երկրապահներս վերջին խորհրդակցության ժամանակ որոշել ենք հանդես գալ Երկրապահ ուժի ձեւաչափով, համալրել Երկրապահը, եւ դառնալ մի կուռ կառույց բանակի ռեզերվում՝ չխանգարելով բանակի ռեսուրսին»,- ընդգծեց ԵԿՄ նախագահը:

Միջոցառումից անմիջապես հետո Սասուն Միքայելյանը պատասխանեց VERELQ-ի հարցերին: «ԵԿՄ-ի շարքերը մաքրվում են և շարունակելու ենք մաքրել: Երկրապահը պետք է վերադառնա իր արմատներին: Երբ գլխավորեցի այս կառույցը շատ տարօրինակ երևույթներ կային, որոնցից ազատվել ենք», - ասաց Միքայելյանը՝ պատասխանելով հարցին՝ ինչ փոփոխություններ են կատարվել ԵԿՄ-ում ի պաշտոնավարման ընթացքում:

Մենք նաև հարց ուղղեցինք առ այն, որ որոշ իրավա-քաղաքական շրջանակներ կարևորում են ԵԿՄ-ի ապառազմականացման գործընթացը, որին ի պաասխան Միքայելյանը զարմանք հայտնեց. «Ինչի մենք ռազմականացված կառո՞ւյց ենք»: Այնուհետև նա շարունակեց. «Մենք միշտ կիսառազմականացված կառույց ենք եղել: Մշտապես եղել ու մնում ենք պետության կողքին: Մենք չենք խանգարելու բանակի մոբիլիզացիայի գործընթացին, այլ միայն օգնելու ենք դրան», - ասաց նա: