Հայաստանը երկշաբաթյա ժամկետով մասնակի սահմանափակել է դեպի Իրան օդային փոխադրումները

Հայաստանի Քաղաքացիական ավիացիայի կոմիտեն երկշաբաթյա ժամկետով մասնակի սահմանափակել է դեպի Իրան օդային փոխադրումները:

«Հարգելի քաղաքացիներ,

Տեղեկացնում ենք, որ Հայաստանի Հանրապետության կառավարության կողմից կորոնավիրուսի համաճարակի տարածման կանխարգելման միջոցառումների շրջանակներում որոշում է կայացվել մասնակի սահմանափակել Հայաստանի Հանրապետությունից (այսուհետ՝ Հայաստան) դեպի Իրանի Իսլամական Հանրապետություն (այսուհետ՝ Իրան) օդային փոխադրումները երկշաբաթյա ժամկետով՝ սկսած 2020 թվականի փետրվարի 24-ից։

Մասնավորապես, Հայաստանից դեպի Իրան կարող են փոխադրվել Հայաստանում գտնվող Իրանաբնակ քաղաքացիները, իսկ Իրանից դեպի Հայաստան՝ Հայաստանաբնակ քաղաքացիները։

Հարգանքով,

Քաղաքացիական ավիացիայի կոմիտե», - ասված է Facebook սոցիալական ցանցում Քաղավիացիայի կոմիտեի կատարած գրառման մեջ:

Իրանում կորոնավիրուսով վարակման դեպքերի թիվը հասել է 47-ի, մահացել է 12 մարդ: ՌԻԱ Նովոստիի հաղորդմամբ՝ այս մասին հայտարարել է Իրանի խորհրդարանի նախագահության ներկայացուցիչ Ասադուլլահ Աբբասին:

Միևնույն ժամանակ նա նշել է, թե անհանգստանալու պատճառ չկա:

VERELQ-ը հիշեցնում է, որ փետրվարի 24-ից Հայաստանը երկու շաբաթով դադարեցնում է ցամաքային հաղորդակցությունը Իրանի Իսլամական Հանրապետության հետ: Վարչապետ Նիկոլ Փաշինյանը ներկայացրել է սահմանափակումների մասին տեղեկատվություն: