Զինծառայողներից մեկը կյանքի հետ անհամատեղելի վիրավորում ունի. Տոնոյան

Երեկ ՊԲ հյուսիսային ուղղությամբ տեղակայված զորամասերից մեկում հրազենային վիրավորում ստացած զինծառայողներից մեկը կյանքի հետ անհամատեղելի վիրավորում ունի: Այս մասին լրագրողների հետ ճեպազրւյցում ասաց ՀՀ պաշտպանության նախարար Դավիթ Տոնոյանը:

Խոսքը 2001թ. ծնված Հենրի-Հայկ Սիմոնի Զաքարեանի մասին է:

Նախարարը հավաստիացրեց, որ բժիշկներն ամեն ինչ անում են, որպեսզի փրկեն նրա կյանքը։ «Զինծառայողը շուտով կտեղափոխվի Երևան»,- ասաց նա։

Ինչ վերաբերում է վիրավորում ստացած երկրորդ զինծառայողին՝ Արմեն Ջոնիկի Մեսրոպյանի, ապա վերջինիս վիրավորումը, բարեբախտաբար, թեթև է։

Դավիթ Տոնոյանը հրաժարվեց բացահայտել, թե ո՞րն է եղել միջադեպի պատճառը. 

«Նախաքննության արդյունքում պարզ կլինի, այժմ որևէ բան ասել չեմ ցանկանում։ Լինում են նման դեպքեր, որոշակի վերահսկողությունից դուրս է եղել», -հավելեց նա։

VERELQ-ը հիշեցնում է, որ հունվարի 24-ին՝ ժամը 06:55-ի սահմանում, ՊԲ հյուսիսային ուղղությամբ տեղակայված զորամասերից մեկում, դեռևս չպարզված հանգամանքներում, հրազենային վիրավորում են ստացել ՊԲ զինծառայողներ, 2001թ. ծնված Հենրի-Հայկ Սիմոնի Զաքարեանը և 2000թ. ծնված Արմեն Ջոնիկի Մեսրոպյանը:

Հենրի-Հայկ Սիմոնի Զաքարեանը նախօրեին վիրահատվել է: Հրազենային վիրավորումներ ստանալու դեպքի առթիվ հարուցվել է քրեական գործ։