Ներկա փուլում որևէ փաստաթուղթ չի քննարկվում. ՀՀ ԱԳՆ պատասխանը Մամեդյարովին

192

Հայաստանն ու Ադրբեջանը Լեռնային Ղարաբաղի հակամարտության կարգավորման գործընթացքում որևէ փաստաթուղթ այս պահին չեն քննարկում, ինչի մասին մենք բազմիցս նշել ենք: Այս մասին լրագրողների հետ հանդիպմանը հայտարարեց ՀՀ ԱԳՆ խոսնակ Աննա Նաղդալյանը՝ մեկնաբանելով Ադրբեջանի ԱԳ նախարար Էլմար Մամեդյարովի վերջին հարցազրույցում հնչեցրած հայտարարությունը:


«Մենք բազմիցս ենք նշել, որ ներկա փուլում որևէ փաստաթուղթ չի քննարկվում»,- ասաց նա:


Հիշեցնենք, Մամեդյարովը նախօրեին տված հարցազրույցում նշել էր, որ Բրատիսլավայում կայացած վերջին հանդիպման ընթացքում անդրադարձ է կատարվել այսպես կոչված «Լավրովի պլան»-ին:


Շարունակելով Աննա Նաղդալյանը նշեց, որ Հայաստանի դիրքորոշումը ԼՂ հարցում հստակ ներկայացվել է:

«Ղարաբաղյան հիմնախնդրի կարգավորման հիմքն Արցախի ժողովրդի ինքնորոշման իրավունքի ճանաչումն է, որը պետք է իրացվի առանց սահմանափակման և հարկադրման: Արցախի ժողովուրդը կարող է որոշել ինքնորոշման ցանկացած տարբերակ: Արցախի ժողովուրդն իրավունք ունի պահպանել և սահմանել իր կարգավիճակը Ադրբեջանի ինքնիշխանությունից, իրավասությունից և տարածքային ամբողջականությունից դուրս: Այն բոլոր առաջարկները կամ մեկնաբանությունները, որոնք չեն ապահովում Արցախի ժողովրդի ինքնորոշման իրավունքի իրացումը, չեն կարող ընդունելի լինել Հայաստանի համար»,- ասաց Նաղդալյանը:


Ինչ վերաբերում է Մամեդյարովի այն արտահայտությանը, թե հասկանալի չէ՝ ո՞րն է Հայաստանի համար անվտանգություն հասկացությունը, խոսնակը շեշտեց՝ Հայաստանի դիրքորոշումն այդ հարցում հստակ է: Իսկ Ադրբեջանը այս 30 տարիներին իր հայատյաց քաղաքականությամբ հստակ փաստել է, որ որևէ պարագայում չի կարող ապահովել Արցախի ժողովրդի անվտանգությունը.


«Հայաստանը Արցախի անվտանգության երաշխավորն է, և Արցախի անվտանգությունը ենթակա չէ զիջման: Չի կարող լինել մի իրավիճակ, երբ Արցախի ժողովուրդը մնա առանց պաշտպանության համար անհրաժեշտ անվտանգության գծերի»,- հավելեց ԱԳՆ ներկայացուցիչը:


 


 


 


 


 


 


 


 

Տպել

Թեմայի այլ նորություններ
Загрузка...