28.03.2024
Երկրաշարժ՝ Շիրակի մարզում
prev Նախորդ նորություն

Նորություններ գործընկերներից

Մամուլ. ԲՀԿ-ն արտաքին ազդակներ է ստացել արմատական ընդդիմություն դառնալու մասի՞ն

VERELQ-ը ներկայացնում է հայաստանյան մամուլի ամենաուշագրավ հրապարակումները:


«Հրապարակ» թերթը գրում է. «Վերջին շրջանում ԲՀԿ-իշխանություն փոխհարաբերություններում նկատելի կոշտությունը ոչ այնքան Գեւորգ Պետրոսյանի առաջ քաշած օրակարգով է պայմանավորված, որքան որ՝ ավելի խորը արմատներ ունի։ Մեր տեղեկություններով՝ ԲՀԿ-ն արտաքին ազդակներ է ստացել արմատական ընդդիմություն դառնալու մասին, մասնավորապես Ռուսաստանից հասկացրել են՝ թույլ չեն տա, որ նախկինի նման համապարփակ աջակցություն ցուցաբերեն Նիկոլ Փաշինյանի իշխանությանը եւ, ինչպես անցյալում, մեկ էլ հանկարծ կոալիցիա մտնեն։ Հիմա Ռուսաստանին պետք է, որ Հայաստանում ուժեղ ընդդիմություն ձեւավորվի, եւ այդ դաշտում ԲՀԿ-ն անելիք ունի։ Այս ազդակներից հետո ԲՀԿ-ն կոշտացրել է պահվածքը։ Առաջին ատամը երեկ ցույց տվեցին՝ միաձայն տապալելով ԱԺ նախագահի՝ Անվտանգության խորհրդի նիստերին մասնակցելու առաջարկով նախագիծը եւ հայտարարեցին նաեւ, որ հաջորդ տարվա բյուջեի նախագծին դեմ են քվեարկելու»:


«Ժողովուրդ» թերթը գրում է. «Հանրային խորհրդի նախագահ Վազգեն Մանուկյանի հրաժարականից հետո խորհրդի նրա գործընկերները «Ժողովուրդ» օրաթերթի հետ զրույցում չեն համաձայնել իշխող թիմում առկա այն տեսակետի հետ, թե Մանուկյանը չէր պահպանում քաղաքական չեզոքությունը: ՀԽ անդամ Կարինե Դանիելյանը «Ժողովուրդ» օրաթերթին ասել է. «Ես նաեւ նախորդ ՀԽ-ում եմ եղել, եւ մենք անընդհատ հանդիպել ենք ե՛ւ նախարարների հետ, ե՛ւ վարչապետի, ե՛ւ նախագահի հետ»: Վ. Մանուկյանն, ի դեպ, ավելի վաղ հայտարարել էր, թե հրաժարական կտա, եթե Նիկոլ Փաշինյանն իրեն ասի, որ չի ուզում աշխատել իր հետ: «Ժողովուրդ» օրաթերթը վարչապետի մամուլի խոսնակից փորձել է պարզել` վարչապետն ասել է արդյոք նրան այդ մասին, Վլադիմիր Կարապետյանը պատասխանել է. «Վարչապետի եւ Վ. Մանուկյանի միջեւ հանդիպում, զրույց չի եղել»: Այսինքն՝ չի ասել: Ի դեպ, ըստ շրջանառվող տեղեկությունների` ՀԽ նոր նախագահի հավանական թեկնածուներից է քաղաքագետ Ստյոպա Սաֆարյանը: Հիշեցնենք, որ Մանուկյանի փեսան Կադաստրի կոմիտեի ղեկավարի պաշտոնից վերջերս ազատվելու դիմում գրած Սահրատ Պետրոսյանն է»:


«Հրապարակ» թերթը գրում է. «Բողոքի ակցիաների արդյունքում ինչ-որ հարցերում նախարարությունը վերանայե՞լ է իր մոտեցումները, ասենք՝ հայ առաքելական եկեղեցու պատմության մասով վերջնական որոշում կա՞․ հարցրինք ԿԳՄՍ փոխնախարար Արեւիկ Անափիոսյանին: «Ո՛չ։ Թե՛ ես, թե՛ պարոն Հարությունյանը արդեն քանիցս նշել ենք` չկա որոշում, կան քննարկումներ»: Իսկ հայոց լեզվի-գրականության, պատմության դասավանդման նկատմամբ փոխվե՞լ է մոտեցումը։ «Ոչ, դա բուհերի ինքնավարության խնդիրն է, եւ եթե մեր դպրոցը չի կարողանում տալ այն կարեւոր գիտելիքները` հայոց լեզվի, գրականության եւ հայոց պատմության մասով, դա առանձին խոսակցություն է։ Այս հարցում եւս պատրաստ ենք բազմակողմանի քննարկման, այնուհանդերձ, արձանագրենք, որ այն, ինչ սովորեցնում ենք մենք բուհերում, բացառապես հանրակրթության շրջանակներում լուծելու խնդիր է, բայց, միեւնույն է` պատրաստ ենք քննարկման»: Նահանջ, այսպես ասած` «զադնի» կդնե՞ք այս 2 հարցում։ «Նայած որ հարցում` ինչ պատճառաբանությամբ։ Օրենքը կդրվի հանրային քննարկման, կփորձենք հասկանալ՝ եթե խնդիրները հստակ դրվեն, մեթոդաբանությունը նույնպես կհստակվի»: Ասում են՝ սա գլոբալիստների պահանջն է՝ թավշյա հեղափոխությամբ իշխանության եկածներիդ` ազգային արժեքները, պահպանողականությունը ոչնչացնելը։ «Ինքներդ էլ կարող եք նկատել, որ այդ գնահատականներն առկա են մարգինալ խմբերում եւ տարբեր հրահրումների արդյունքում բարձրացված աղմուկ են։ Այդ «մտահոգությունները», որոնք այսպես հախուռն բարձրացվում են, օրենքի հիմքում ընդհանրապես չկան»:


«Ժողովուրդ» թերթը գրում է. Երբ նախորդ տարի Երեւանի «Նորք» ինֆեկցիոն հիվանդանոցի տնօրեն նշանակվեց Մհեր Դավիդյանցը, մեծ աղմուկ բարձրացավ: Մամուլում հրապարակումներ եղան, որ Դավիդյանցը առողջապահության նախարար Արսեն Թորոսյանի մտերիմ ընկերն է: Ավելին, նշանակումից կարճ ժամանակ անց, հենց նախարարի հրամանով, ընկերոջ` Դավիդյանցի աշխատավարձը 350 հազար դրամից դարձավ 710 հազար դրամ, թերեւս որպեսզի կլինիկայի տնօրենը հանկարծ աչքն աջուձախ չգցի: Անցած տարվա հոկտեմբերի 14-ին նախարար Թորոսյանը, հավաքելով բոլոր հիվանդանոցների տնօրեններին մի հարկի տակ, խստիվ զգուշացրեց. «Պետք է մեկընդմիշտ ֆիքսենք, որ հարկատուների վճարումներից գոյացած պետբյուջեի միջոցները չպետք է գողացվեն կամ վատնվեն` անկախ զբաղեցրած դիրքից, սեփականության ձեւից: Հարկատուների միջոցները սուրբ միջոցներ են, եւ դրանց նկատմամբ ոտնձգությունները աշխարհում ու նաեւ Հայաստանում այսուհետ համարվելու է ծանր հանցագործություն: Սա սպառնալիք չէ, այլ սկզբունքի որդեգրում…»:


Բայց ավելի քան 1 տարի անց, փաստ է, որ նախարարին ականջալուր չեն հենց նրա նշանակած կադրերը: ArmLur.am լրատվականին տրամադրել են մի տեսանյութ, որում «Նորք» ինֆեկցիոն հիվանդանոցի աշխատակիցը տնօրեն Մհեր Դավիդյանցի հետ աշխատանքային հարցեր քննարկելիս նրանից հարցնում է, թե ինչ անի այն փողը, որը գոյացել է «այլ ծախսերի» անվան տակ. ձեւակերպված եւ դուրս գրված 100 հազար դրամից հրահանգ կա 25 հազարական դրամ հետ հավաքել, դնել սեյֆում: Ում համար` տեսանյութից պարզ չի դառնում: Բայց հասկանալի է, որ սեյֆում պահվող գումարը տնօրենի ծախսելիքը չէ, այլ, ըստ ամենայնի, ինչ-որ մեկին փոխանցելու համար: Ում համար էր տնօրեն-ընկերը գումար հավաքում` ամենաառաջինը պետք է հետաքրքրի հենց նախարար Թորոսյանին, որ սուր է ճոճում ընդդեմ կոռուպցիայի, բայց հենց իր քթի տակ նման գործարքներ են լինում: Այս տարվա մարտին էլ ԱԱԾ-ն կաշառք ստանալու պահին աշխատասենյակում ձերբակալեց առողջապահության փոխնախարար Արսեն Դավթյանին: ArmLur.am-ի հարցմանը՝ «Շարունակո՞ւմ է արդյոք առողջապահության նախարար Արսեն Թորոսյանը վստահել իր կողմից նշանակված կադրերին, առավել եւս` իր ընկերներին, եւ երաշխավորել նրանց օրինական աշխատանքի համար, թե՞ ոչ», Առողջապահության նախարարության գլխավոր քարտուղարի տեղակալ Վահե Հակոբյանը պատասխանել է. «Նախարարությունը նման տեղեկատվության չի տիրապետում: Եթե առկա են փաստեր, խնդրում ենք գրավոր ներկայացնել»: Ահավասիկ գրավոր փաստերը»:


«Ժամանակ» թերթը գրում է. «Ազատ հայրենիք» խմբակցության անդամների հետ հանդիպման ժամանակ վարչապետ Նիկոլ Փաշինյանը հայտարարել է, որ Հայաստանի իշխանությունները չեն աջակցելու որեւէ քաղաքական ուժի կամ թեկնածուի եւ որեւէ կերպ չեն խառնվելու Արցախի Հանրապետության նախագահական ու խորհրդարանական ընտրություններին: Բայց նաեւ նշել է, որ Արցախում պետք է հաղթեն այն ուժերը, որոնք աջակցել են Հայաստանում տեղի ունեցած ոչ բռնի հեղափոխությանը եւ կիսում են այդ հեղափոխության գաղափարախոսությունը: Ըստ էության, «Ազատ հայրենիքը» միակ կուսակցությունն էր, որն ի սկզբանե հայտարարել է, որ ողջունում է Հայաստանում տեղի ունեցած իշխանափոխությունը, եւ մշտապես մասնակցել է Հայաստանում կազմակերպված հանրահավաքներին»:


«Փաստ» թերթը գրում է. «Արցախում հաջորդ տարի սպասվող նախագահական ընտրությունների շեմին ֆավորիտ համարվող թեկնածուներից երկուսը՝ նախկին վարչապետ Արայիկ Հարությունյանն ու ԱԳ նախարար Մասիս Մայիլյանը, ընդգծված «փաշինյանակենտրոն» գծի մեջ են գործում եւ իրենց հռետորաբանությունը կառուցում: Ըստ էության, որքան էլ դա այօսր «թրենդի» մեջ է, սակայն ոչ բոլոր արցախցիներին է բավարարում եւ գոհացնում: Հաշվի առնելով այն հանգամանքը, որ Արցախի հերոս Վիտալի Բալասանյանն էլ հակառակ «թրենդի» մեջ է՝ պարբերաբար հանդես է գալիս ընդգծված հակափաշինյանական հայտարարություններով, ստեղծված իրավիճակում ընտրություններին ակտիվ արշավի դեպքում ոչ վատ դիրքերում կարող է հայտնվել ԱԺ նախագահ Աշոտ Ղուլյանը, ով իր հանդիպումներն սկսել է, ինչպես ինքն է ասում, արցախակենտրոն քաղաքականության մեջ: Իրականում, ինչպես արցախցիներն են նշում, արցախցու համար առանցքայինն իր անվտանգությունն ու կենսամակարդակի բարձրացումն է, ով դա ապահովի, նա էլ հաջողություն կունենա՝ անկախ նրանից, թե ով է Հայաստանի ղեկավարը»:


«Ժամանակ» թերթը գրում է. «Սա նշանակում է, որ մենք մոտենում ենք հաջորդ կարեւոր արդյունքին, որ հայ ժողովրդի շրջանում հայկական իրականության մեջ չկա բանավեճ ղարաբաղյան հարցի վերաբերյալ, եւ մենք շուտով կհասնենք այն վիճակին, որ հայության դիրքորոշումները Ղարաբաղի հարցի կարգավորման հարցում նույնական են»,- Փարիզում հայկական համայնքի հետ հանդիպմանը հայտարարել է վարչապետ Նիկոլ Փաշինյանը՝ խոսելով Արցախի հարցում կառավարության նոր քաղաքականության մասին: Փաշինյանն անում է կարեւորագույն հայտարարություն, որն ունի խորքային հիմնարար իմաստ հայկական պետականության անվտանգության առանցքի, հայկական պետականության ողնուղեղ նշանակություն եւ դեր ունեցող հարցի առումով: Մինչ այդ նա ասել է, որ հարյուր տոկոս նույնական են Հայաստանի եւ Արցախի ղեկավարությունների մոտեցումները, այդպիսով արձանագրելով արդեն տվյալ հարցում համահայկական նշաձողի, համահայկական կոնսենսուսի սահմանման խնդիրը: Այլ կերպ ասած, Նիկոլ Փաշինյանը, տալով այդ համահայկականության շրջանակը, ազդարարում է Արցախի հարցը հայկական հարցի ծանրության կենտրոն վերածելու ռազմավարության մասին: Դա ամենեւին չի նշանակում, որ երկրորդ պլան է մղվում Հայ դատի, Հայոց ցեղասպանության ճանաչման հարցը:


Հակառակը, Արցախի հարցում համահայկական բանավեճի այլեւս բացառումը՝ ինչը նշանակում է համահայկական կոնսենսուսի հաղթանակը պաշտպանելու եւ հայկական պետականության անվտանգային ներկայիս ռազմա-քաղաքական համակարգը ամրապնդելու առումով, Արցախի հարցը դիտարկում է Հայ դատի եւ ցեղասպանության ճանաչման ու հետեւանքների վերացման համատեքստում՝ արձանագրելով, որ հայությունը գործնականում իր ջանքով արդեն իսկ սկսել է հետեւանքների վերացումն ու կանխարգելումը, եւ Արցախն ու ներկայիս անվտանգային համակարգը դրա վառ օրինակն են: Այլ կերպ ասած, 100-րդ տարելիցի՝ «հիշում եմ ու պահանջումը», թավշյա հեղափոխությունից հետո փաստացի վերածվում է «դատապարտում ենք եւ վերականգնում» խորագրի՝ հայկական իրավունքներն ու կորուստները: Դա իսկապես հայտարարություն է լրջագույն տրանսֆորմացիայի մասին, որի վերաբերյալ համաշխարհային հայությունն իհարկե պետք է կայացնի հիմնարար որոշում: Երեւանը, փաստացի, համայն հայությանն առաջարկում է Հայ դատի, հայկական հարցի համաշխարհային հարցադրման առարկայացման բանաձեւն ու մեխանիզմը, որում հայությունն այլեւս ոչ թե հայցվոր է, այլ վճիռ կայացնող եւ գործող: Խիստ հատկանշական ու խորհրդանշական է, որ այդ մասին փաստացի ազդարարվում է Առաջին աշխարհամարտի 100-րդ տարելիցի առիթով Փարիզի Խաղաղության համաժողովի օրերին, որին մասնակցելու համար էր Հայաստանի վարչապետը մեկնել Ֆրանսիա եւ դրա շրջանակում էլ կազմակերպել հանդիպումը հայ համայնքի հետ: Փարիզյան համաժողովը անցնում է պատերազմի կանխարգելման տրամաբանությամբ: Այդ առումով, Հայաստանը փաստացի պատերազմի կանխարգելման տեսական «դիսկուրսին» ներգրավվում է գործնական արդյունքով»:


«Հրապարակ» թերթը գրում է. «Երեկ երեկոյան ժամը 10-ից «Սանիթեք» ընկերությունը սկսել է Երեւանում հավաքել իր աղբամանները։ Դա բացատրեցին այսպես․ «Քանի որ Երեւանի քաղաքապետարանը միակողմանի խզել է պայմանագիրը «Սանիթեքի» հետ, իսկ «Սանիթեքի» գույքը գրավադրված է բանկում, այդ թվում՝ նաեւ աղբադույլերը, ուստի ընկերությունը հավաքում է իր գույքը, որ հանձնի բանկին»: Մոտավորապես այսպես, որ բանկը հետագայում չասի, թե գրավադրված գույքին տեր չեք կանգնել։ Դեռ այն ժամանակ, երբ «Սանիթեքը» գործում էր, աղբամանները հաճախ այրում եւ վնասում էին, հիմա, երբ Երեւանի աղբահանությամբ զբաղվող ընկերությունն իր աղբամաններն է տեղադրել եւ «Սանիթեքի» աղբամանները շրջել է, դրանք մնացել են անտեր ու չեն օգտագործվում։ Ընկերությունը ծանուցել է բանկի ներկայացուցիչներին, որ գան եւ մասնակցեն աղբամանների հավաքել-հանձնելու գործընթացին»:


«Ժամանակ» թերթը գրում է. «Հայր եւ որդի Խոստեղյաններն իրենցով են արել Գեղարքունիքի հարկայինը։ Հայրը՝ Սիմակ Խոստեղյանը, երկար տարիներ եղել է Գեղարքունիքի հարկայինի պետը։ Ներկայումս նա նույն հարկայինում զբաղեցնում է սպասարկման բաժնի պետի պաշտոնը։ Օրերս էլ նրա որդին՝ Սասուն Խոստեղյանը, նշանակվել է Գեղարքունիքի հարկայինի պետի տեղակալ։ Խոստեղյանը հին գել է, ինչպես ասում է ժողովուրդը։ Ասում են՝ հարկայինի պետ եղած ժամանակ մարզի բոլոր հարկատուների, տնտեսվարողների հետ լեզու էր գտել. նրանք մուծվում էին, ինքը աչք էր փակում։ Ինչպես երեւում է՝ Պետական եկամուտների կոմիտեն աստիճանաբար վերածվում է Պետական եկամուտների ընտանիքի։ Այս կառույցում որոշ բարձրաստիճան պաշտոնյաների գերդաստանով աշխատելու մասին բազմիցս ենք գրել։ Վատագույն ավանդույթները, սակայն, շարունակվում են»։

Գազի սակագինը մինչև ապրիլի 1-ը չի թանկանա. փոխվարչապետ
Հաջորդ նորություն next
 Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար
25.03.2024
Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար