«Սասնա Ծռեր» համահայկական կուսակցության պատվավոր ներկայացուցիչ Ժիրայր Սեֆիլյանը իր ֆեյսբուքյան էջում գրել է.
«Ամեն անգամ, երբ Ռուսական կայսրությունը թուլանում է և մեր տարածաշրջանից հեռանալու փաստի առաջ է կանգնում, ձգտում է ուժային և արյունոտ մի վերջին հարվածով մեզ վնասելու միջոցով կառչել-մնալ կամ առնվազն հող ստեղծել իր հետագա վերադարձի համար։ Դեպի Արցախ Միասնության ավտոերթը այն շատ կարևոր քայլերից մեկն է, որով կարող ենք կանխել թուլացող Ռուսական կայսրության՝ պատմականորեն սովորական դարձած հավանական հարվածը։
Ժամանակն է պատմությունից դասեր քաղելու և վտանգը չեզոքացնելու»։
Սասնա Ծռեր կուսակցությունը շարունակում է հանդես գալ հակառուսական հայտարարություններով ու ՌԴ-ի ու ՀԱՊԿ-ի, հայ-ռուսական հարաբերությունների խորացման դեմ ուղղված քայլերը դարձել են այդ կուսակցության հիմնական ուղենիշն ու օրակարգը:
«Սասնա Ծռերը»՝ Ժիրայր Սեֆիլյանի շուրթերով խոսում է Ռուսական կայսրության մասին, որը ցանկանում է վնասել ՀՀ-ին ու Արցախին: Ինչպես հայտնի է, Ռուսական կայսրությունը այլևս պատմություն է և գոյություն չունի, իսկ ՌԴ-ն Հայաստանի ռազմավարական դաշնակիցն է, ռուսական զորքերը պաշտպանում ու հսկում են հայ-թուրքական ու հայ-իրանական սահմանը, հայոց բանակը զինված է ռուսական զենքով, որը ՀՀ-ին է վաճառվել ներքին ռուսական գներով ու անգամ վարկային գծի շրջանակներում:
Հարյուր հազարավոր հայեր գտնվում են ՌԴ-ում, այդ երկրի քաղաքացիներ են և իրենց արժանի տեղն են գտել այդ երկրի տնտեսության մեջ ու կյանքի բոլոր ոլորտներում, իսկ ՀՀ-ի քաղաքացի աշխատանքային միգրանտները տարեկան միլիոնավոր դոլարներ են ուղարկում ՀՀ տրանսֆերտների տեսքով ու այդ կերպ կարողանում են ապահովել իրենց ընտանիքները:
ՌԴ-ն այդ կերպ նաև կանխում է ՀՀ-ից արտագաղթի էլ ավելի մեծ ալիքը, որը հնարավոր է սկսվի, եթե հայ միգրանտները, այդ թվում ՀՀ-ից հնչող տարբեր հակառուսական հայտարարությունների պատճառով , չկարողանան աշխատանք գտնել ՌԴ-ում:
Հայաստանի տնտեսությունը սերտորեն կապված է ՌԴ-ի տնտեսության հետ, ՀՀ-ում սպառվող գազը ռուսական է և եթե Ռուսաստանը շուկայական, եվրոպական գներ սահմանի մեր երկրի համար՝ հայկական տնտեսությունը մեկ օրում կհայտնվի կոլապսում: Նույնը կարող է տեղի ունենալ, եթե ՌԴ-ն դադարի ներքին ռուսական գներով զենքեր առաքել ՀՀ-ին՝ Երևանը չի կարողանա սպառազինությունների մրցավազքում դիմակայել Ադրբեջանին, ով միլիարդավոր դոլարներ է ծախսում զենքեր գնելու վրա:
ՀՀ-ի կախվածությունը ՌԴ-ից մեծ է, հայ-ռուսական կապերի խորացումը բխում է ՀՀ ազգային, պետական շահերից, այդ թվում Արցախի շահերից: Ինչքան տնտեսությամբ, ռազմական առումով հզոր լինի Հայաստանը, այնքան ապահով կլինի Արցախի թիկունքն ու Բաքվին դիմակայելու Ստեփանակերտի հնարավորություններն ավելի լայն կլինեն:
«Սասնա Ծռերն» իրենց հակառուսական օրակարգով ու հայտարարություններով հարվածի տակ են դնում թե՛ հայ-ռուսական հարաբերությունների ապագան, թե՛ ՀՀ-ի ու Արցախի անվտանգությունը:
Թուրք-ադրբեջանական տանդեմի առաջ ՀՀ-ն չպետք է հայտնվի առանց ՌԴ-ի պես հզոր գերտերության օգնության ու աջակցության՝ դա հայոց նոր ցեղասպանության սկիզբը կարող է ազդարարել:
