Հարցաքննվել եմ, առերեսվել եմ. Դավիթ Սանասարյանը չի շտապում բացահայտել իր կարգավիճակը

173

Ես ունեմ լռելու պարտավորություն, բայց դա չի նշանակում, որ ես չեմ կարող համապատասխան տեղեկատվություն տրամադրել, որպեսզի չկարողանան իմ բարի համբավի վրա որևիցե բիծ անեն, որը ձեռք է բերվել տասնյակ տարիների պայքարի արդյունքում:


Այս մասին լրագրողների հետ ճեպազրույցում հայտարարեց Պետական վերահսկողության ծառայության պետ Դավիթ Սանասարյանը՝ հրաժարվելով խոսել ՊՎԾ աշխատակիցների ներգրավմամբ քննվող քրեական գործի մանրամասների մասին:


«Ինչ նախաքննական մարմին էլ ուզում է լինի, ինչ ցուցմունք տվող ուզում է լինի՝ չեն կարող դրա վրա խազ քաշել: Ես բնականաբար համաձայն չեմ դրա հետ ու վիճարկելու եմ համապատասխան իրավական ընթացակարգով»,- ասաց նա՞


Ինչ վերաբերում է հարցին, թե ինքն ի՞նչ կարգավիճակ ունի, քանի որ մամուլը գրել էր, որ կասկածյալ է, Սանասարյանն ուղղորդեց այդ հարցերը տալ ԱԱԾ-ին: Բայց և հաստատեց, որ հարցաքննվել է, առերեսվել է և ասել է այն, ինչ իրեն հայտնի է: «Չեմ կարող հայտնել, թե ով ինչ ցուցմունք է տվել իմ դեմ: Բայց կարող եմ ասել, որ որևէ կառույց չի կարող ինձ որևէ կոռուպցիոն երևույթի հետ կապել, քանի որ ես մերժում եմ ցանկացած կոռուպցիոն երևույթ: Ինձ հեգնողներին էլ ասեմ, որ գերեզմանում էլ լինեմ՝ պայքարելու եմ կոռուպցիայի դեմ»,- հավելեց Դավիթ Սանասարյանը:


Դավիթ Սանասարյանը չի բացառում, որ հարուցված քրեական գործում իր անունը մամուլում տարբեր արտահոսքերի միջոցով շրջանառելը կարող է լինել ներհամակարգային պայքարի հետեւանք:


«Իմ ղեկավարած կառույցի աշխատանքի բնույթն այնպիսի է, որ շատ մարդկանց ոտք ենք տրորում: Չեմ բացառում, որ իրենք էլ փորձեն նման արտահոսքերով էմոցիոնալ ֆոն ստեղծել, որ ես դրանից դրդված հանդես գամ էմոցիոնալ հայտարարություններով: Բայց նման բան չի կարող լինել», -ասաց Սանասարյանը՝ հավելելով, որ խնդրի շուրջ զրուցել է նաեւ ՀՀ վարչապետի հետ:


Նա նաեւ բացառեց, որ վստահության խնդիր կա իր եւ վարչապետի միջեւ: «Նման խնդիր չկա: Այն պահին, երբ վարչապետն ինձ չվստահի, ես անձեռնմխելի չեմ, կարող է հանգիստ ազատել աշխատնքից, կամ այն պահին, երբ ես չվաստահեմ վարչապետին, դիմում կգրեմ ու կգնամ», - ասաց Սանասարյանը: Նրա որակմամբ, մամուլում տեղի ունեցող տեղեկատվական արտահոսքերը կատարվում են իրեն վարկաբեկելու համար, սակայն վստահ է, որ չի ստացվելու: «Ես պայքարել ու պայքարելու եմ կոռուպցիայի դեմ», - ասաց նա:


Հիշեցնենք, մամուլը գրել էր, որ ՊՎԾ աշխատակիցներին վերաբերող քրեական գործով ՊՎԾ պետ Դավիթ Սանասարյանը ներգրավվել է որպես կասկածյալ: Ըստ աղբյուրի՝ նրա նկատմամբ խափանման միջոց է ընտրվել՝ ստորագրություն չհեռանալու մասին։


Նախօրեին ՀՀ գլխավոր դատախազ Արթուր Դավթյանն էլ  ո՛չ հերքեց, ո՛չ հաստատեց այդ լուրը: 

Տպել

Թեմայի այլ նորություններ
Загрузка...