Մենք չենք կարող քննարկել «տարածքներ խաղաղության դիմաց» բանաձևը. Փաշինյան

Բացառված է լինի տեղեկատվություն, որից հանրությունը տեղեկացված չլինի: Այս մասին լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը՝ անդրադառնալով ղարաբաղյան հակամարտության շուրջ վերջին զարգացումների մասով արձագանքներին:

Նախ, նա անդրադարձավ ԱՄՆ նախագահի անվտանգության հարցերով խորհրդական Ջոն Բոլթոնի հետ հեռախոսազրույցին.

«Ես ասել եմ, որ Բոլթոնի հետ հեռախոսազրույցի ընթացքում Ղարաբաղի հարց չի քննարկվել, Ղարաբաղ կամ Արցախ անունը չի շոշափվել»:

Լրագրողի հարցին, թե Բոլթոնի հետ ի՞նչ օրակարգ պետք է ունենա Հայաստանի վարչապետի, եթե ոչ ամենակարևոր հարցի շուրջ, Փաշինյանը նշեց, որ տեղեկատվությունն ամբողջ փոխանցվել է թե՛ իր կողմից, թե՛ նաև Բոլթոնի: Իսկ թե ինչու է Բոլթոնը Ղարաբաղի հարցը քննարկել Ալիևի հետ, Փաշինյանը նշեց. «Դա չեմ կարող ասել»:

Այնուհետ նաև խոսեց Իլհամ Ալիևի հետ իր հանդիպումից Դավոսում.

«Իսկ Ալիևի հետ հանդիպումները, ես ասել եմ, դրանք բանակցություններ չեն , դրանք ոչ պաշտոնական շփումներ են, որոնց ընթացքում ուղղակի տեղի է ունենում մտքերի փոխանակություն»,- ասաց նա:

Ինչ վերաբերում է հարցին, թե կա արդյոք նախաձեռնություն սկսել բանակցությունները, Փաշինյանն ասաց, որ այդ հարցը ԱԳ նախարարների քննարկման օրակարգում է գտնվում:

Անդրադառնալով «տարածքներ՝ խաղաղության դիմաց» թեզին՝ վարչապետն ասաց. «Մենք չենք կարող քննարկել «տարածքներ խաղաղության դիմաց» բանաձևը»: