Ալեքսանդր Լուկաշենկոն կոռեկտ չէր. ՀՀ ԱԳՆ

Բելառուսի նախագահ Ալեքսանդր Լուկաշենկոյի կողմից ՀԱՊԿ գլխավոր քարտուղարի նշանակման շուրջ քննարկումները Ադրբեջանի դեսպանի հետ հանդիպմանը ներկայացնելը կոռեկտ չէր: Այս մասին լրագրողների հետ հանդիպմանն ասաց ՀՀ ԱԳՆ խոսնակ Աննա Նաղդալյանը:

«Այս զարգացումն ի ցույց է դնում, որ ՀԱՊԿ շրջանակներում դեռևս նման զարգացումների վերաբերյալ քննարկումների կարիք կա: ՀԱՊԿ-ն իր ներսում խնդիրներ ունի շտկելու: Իսկ ինչ վերաբերում է այս իրադրությանը, ապա պետք է նշեմ, որ դա, ի վերջո, կոռեկտ չէ», պատասխանելով հարցին, թե որքանով ճիշտ էր Հայաստանի հետ նույն անվտանգային բլոկում գտնվող երկրի ղեկավարի կողմից Հայաստանի հակառակորդ երկրի ներկայացուցչի հետ այս հարցը քննարկելը նշեց Նաղդալյանը:  

Հիշեցնենք, նախօրեին Ադրբեջանի դեսպանի հետ հանդիպմանը Ալեքսանդր Լուկաշենկոն հայտարարել էր, որ ՀԱՊԿ գլխավոր քարտուղարի թեկնածուներ շատ կան, բայց դա չի նշանակում, թե իրենք նսեմացրել են Հայաստանի շահերը, կամ ինչ-որ մեկը հաղթել է, մյուսը՝ պարտվել.

«Հարցը նրանում է, որ Նիկոլ Փաշինյանը պետք է կառավարությունում գլուխ հանի ստեղծված իրավիճակից, քանի որ Հայաստանն այսօր նախագահում է ԵԱՏՄ-ում, մեր տնտեսական միությունում և ՀԱՊԿ-ը մեծ բեռ է մի երկրի վրա, որը գտնվում է անցումային շրջանում: Կկարողանա՞ Հայաստանը: Եթե Նիկոլ Փաշինյանը սա հասկանա ու մեզ պատասխան տա, ապա դա տեղի կունենա Սանկտ Պետերբուրգում»,- ասել է Լուկաշենկոն, նշելով, որ որոշումը հանգիստ պայմաններում կկայացվի այդ օրը նախատեսված հանդիպման ժամանակ: