Հայաստանում, ըստ երեւույթին, Ֆարնկոֆոնիայի գագաթաժողովից հետո կարելի էսպասել կտրուկ քաղաքական իրադարձություններ: Վարչապետ Նիկոլ Փաշինյանը կարող է հրաժարական տալ՝ արտահերթ խորհրդարանական ընտրությունների անցկացման համար:
Վարչապետ Փաշինյանն այսօր լրագրողերի հետ զրույցում, հայտարարել է, որ իր հրաժարակաի մասին հավելյալ կտեղեկացնի՝ շարունակելով պնդել, որ կառավարությունը պատրաստվում է անցկացնել արտահերթ խորհրդարանական ընտրություններ այս տարվա դեկտեմբերին:
«Իմ հրաժարականի մասին հավելյալ կտեղեկացնեմ: Մենք պատրաստվում ենք անցկացնել արտահերթ խորհրդարանական ընտրություններ դեկտեմբերին», - ասել է վարչապետը՝ տեղեկացնելով, որ երկրում ստեղծված իրավիճակը Փարիզում քննարկել է ՀՀ նախագահ Արմեն Սարգսյանի հետ։ «Նա, կարծեմ, ամսի 9-ին վերադառնում է Երեւան, երբ վերադառնա, անպայման կքննարկենք», - ասաց նա։
Ազգային ժողովում հոկտեմբերի 2-ին արտահերթ ընթացակարգով ՀՀԿ, ԲՀԿ և ՀՅԴ խմբակցությունների կողմից նախաձեռնված աղմկահարույց օրենսդրական փոփոխությունները, որոնցով էականորեն դժվարանում է խորհրդարանը ցրելու և արտահերթ ընտրություններ անցկացնելու՝ կառավարության նախաձեռնությունը, երկիրը կանգնեցրել են իստիտուցիոնալ ճգնաժամի շեմին։
Վարչապետ Նիկոլ Փաշինյանը հոկտեմբերի 2-ին ԱԺ-ում բանակցություններից հետո հայտարարել է, որ արտահերթ ընտրությունները տեղի են ունենալու մինչև այս տարվա դեկտեմբերի 15-ը։ Այդ սցենարի կյանքի կոչման համար նա պատրաստվում է հրաժարական տալ, իսկ Ազգային ժողովում ներկայացված խմբակցությունները պարտավորվում են վարչապետի թեկնածու չառաջադրել։ Երկու անգամ ԱԺ-ում վարչապետի թեկնածու չառաջադրելու պարագայում, համաձայն Սահմանադրության, խորհրդարանը ցրվում է և նշանակվում են արտահերթ ընտրություններ։
Այժմ, սակայն, հանրության և փորձագիտական շրջանակներում վստահություն չկա, որ գործընթացները կզարգանան հենց այդ սցենարով, քանի որ խմբակցությունները կարող են ուղղակի վարչապետի նոր թեկնածու առաջադրել և ընտրել։ Այս քայլն, ըստ էության, շեշտակի կխորացնի երկրում սկիզբ առած քաղաքական ճգնաժամը։
Հարցին՝ արդյո՞ք քննարկումներից պարզ դարձել է՝ նախագահը կստորագրի՞ ԱԺ կանոնակարգում փոփոխություններ կատարելու մասին օրենքը: Փաշինյանը նշեց. «Իր գործողությունների մասին ինքը, կարծում եմ, հայտարարություն կանի»:
Նիկոլ Փաշինյանը կարծում է, որ ԲՀԿ ղեկավար Գագիկ Ծառուկյանը, ըստ էության, պաշտպանեց դեկտեմբերին արտահերթ ընտրություններ անցկացնելու գաղափարը՝ իր վերջին հարցազրույցում հնչեցված կարծիքներով: Թեպետ «Ծառուկյան» խմբակցությունը կողմ էր արտահայտվել ՀՀԿ-ի նախաձեռնած օրենսդրական փոփոխություններին, իսկ վերջնիս պատգամավորները շեշտում էին, որ արտահերթ ընտրությունները պետք է անցկացվեն 2019 թ-ի մայիսին, Գագիկ Ծառուկյանն իր հարցազրույցում ասեց հետեւյալը. «Եթե ժողովուրդը ցանկանում է արտահերթ ընտրություններ անցկացնել դեկտեմբերին, ապա ես կողմ եմ»:
«Մասնավորապես, ԲՀԿ ղեկավար Գագիկ Ծառուկյանի հարցազրույցը, ըստ էության, նա պաշտպանեց դեկտեմբերին արտահերթ ընտրություններ անցկացնելու գաղափարը: Ես պատրաստվում եմ այդ հարզացրույցի արդյունքներով հանդիպել պարոն Ծառուկյանի հետ, որպեսզի մենք իրավիճակի ու հանգուցալուծման սցենարների վերաբերյալ պատկերացումները քննարկենք», - ասաց նա եւ հույս հայտնեց, ոչ խոսակցությունը կլինի պաշտոնական ու կառուցողական։
«Երեկ մենք ոչ պաշտոնական հանդիպել ենք, քննարկել, արձանագրել ենք, որ կա ընդհանուր ըմբռնում ու այդ ըմբռնման հիման վրա առաջ կգնանք», - ասաց Նիկոլ Փաշինյանը եւ հայտարարեց, որ Դաշնակցության հետ նույնպես տեղի կունենա հանդիպում։
Դիտարիկմանը, թե ՀՀԿ-ն չի բացառում, որ կառաջադրի վարչապետի թեկնածու, Նիկոլ Փաշինյանն ասաց, թե դա նշանակում է, որ ՀՀԿ-ն շարունակում է իրավիճակը չհասկանալ։
«Նրանք մի կողմից ասում են, որ հանդուժողականության մթնոլորտ են ակնկալում, բայց ամեն ինչ անում են, որ հանրությունը շարունակի իրենց չհանդուրժել, ես կոչ եմ անում այդ ռեժիմից դուրս գալ, չի կարելի անընդհատ տպավորություն ստեղծել, որ կա քաղաքական ուժ, որի նպատակն է խանգարել ժողովրդին, խանգարել պետությանը, խանգարել երկրի առաջ ընթանալուն», - ասաց ՀՀ վարչապետը։
