Վրաստանի վարչապետը խոսել է ՄԱԿ–ի բարեփոխման անհրաժեշտության մասին

Վրաստանի վարչապետ Մամուկա Բախտաձեն հայտարարել է, որ ՄԱԿ–ի աշխատանքները բարեփոխելու ժամանակն է։ Համապատասխան հայտարարություն է նա արել՝ ելույթ ունենալով ՄԱԿ Գլխավոր վեհաժողովի 73-րդ նստաշրջանում։

«Ցավոք պարզվեց, որ ՄԱԿ–ը պատրաստ չէ ժամանակակից աշխարհի առաջ ծառացած մարտահրավերները լուծելուն։ Մեր աչքի առաջ գլոբալ անվտանգության համակարգային էրոզիա է տեղի ունենում, իսկ այսօրվա պայմաններում աշխարհին ավելի գործուն և ուժեղ ՄԱԿ է անհրաժեշտ»,– նշել է Բախտաձեն։

«ՄԱԿ–ի բարեփոխման անհրաժեշտության մասին խոսակցություններ դեռ 1990-ականներին են գնացել, սակայն պետք է ընդունել, որ այդ գործում լուրջ հաջողություններ չեն եղել։ Այժմ եկել է ՄԱԿ–ի բարեփոխումն իրականացնելու ժամանակը, սա շատ հրատապ թեմա է», – հայտարարել է վարչապետը։