Սա հեղափոխության երկրորդ էտապն է, թե՞ Երևանի ավագանու ընտրություններ. Զոհրաբյան

1223

Մենք մասնակցում ենք հեղափոխության երկրորդ էտապի՞ն, թե՞ Երևանի ավագանու ընտրություններին: Հարցը ԱԺ-ում լրագրողների հետ ճեպազրույցում հնչեցրեց «Ծառուկյան» խմբակցության անդամ, Երևանի ավագանու ընտրություններում «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը՝ անդրադառնալով վերջին օրերի զարգացումներին:


Նրա խոսքով, երբ հայտարարվում է, թե ինչ-որ ուժ սպիտակներն են, իսկ մնացածը՝ սևերը, ապա պետք է, որ այդ հայտարարությունները լինեն հասցեական՝ չէ՞ որ պետք է հասկանալ, թե ով է սևը.


«Ինձ համար իմ երկրում չկան սևեր ու սպիտակներ: Առհասարակ տպավորություն է, թե մենք ոչ թե Երևանի ավագանու ընտրություններին ենք մասնակցում, այլ ականատես ենք լինում հեղափոխական հերթական մոբիլիզացիայի: Ես երևանցուն ներկայացնում եմ խնդիրների լուծման ծրագրեր, իսկ դրան զուգահեռ մեկ այլ հարթակում հեղափոխական կոչեր են հնչում: Սա խոսում է երկրի իմունիտետի, երկրի անվտանգության լրջագույն ճգնաժամի մասին»,- ընդգծեց նա:


Ինչպես ավելի վաղ VERELQ-ը գրել էր, նախօրեին Դավիթաշեն համայնքում, նույն ժամին, ընդամենը 200-300 մետր հեռավորությամբ նախընտրական հանրահավաք էին ացկացնում և՛ Նաիրա Զոհրաբյանը, և՛ «Իմ քայլը» դաշինքի քաղաքապետի թեկնածու Հայկ Մարությանը: Սակայն վերջինս շատ արագ ստվերվեց ՀՀ վարչապետ Նիկոլ Փաշինյանի կողմից, ով մասնակցում էր քարոզարշավի, սակայն, ըստ էության, քաղաքական այլ բովանդակությամբ ելույթ ունեցավ, որը ոչ միանշանակ ընկալվեց:


Նաիրա Զոհրաբյանը նաև ընդգծեց՝ եթե իրականում խոսքը ներկայումս հեղափոխական երկրորդ մոբիլիզացիայի ստեղծման մասին է, ապա իրենից ավելի մեծ հեղափոխական թե՛ դուխով և թե՛ խելքով շատ քիչ կարելի է գտնել:


«Եթե մրցակցությունը լինելու է այդ հարթության վրա, ապա որևէ խնդիր չկա, բայց ես հարգում եմ երևանցուն, որովհետև նա ուզում է տեսնել իր խնդիրները լուծված։ Ես հստակ ներդրումային ծրագրով գնալու եմ երևանցիների հետ բակային հանդիպումների, բայց և առաջարկելու եմ՝ հիմա դուք ուզում եք խոսեմ այս ներդրումներից, որոնք լուծելու են առկա խնդիրները, թե՞ անենք հեղափոխական կոչեր։ Եթե երևանցին կասի, որ իրենց պետք են հեղափոխական կոչեր, մենք բոլորս այնպիսի հեղափոխական կոչեր անենք, որ բոլոր հեղափոխականները զարմանան: Բայց այսպիսի քարոզչություն չի կարող լինե»,- շեշտեց Երևանի քաղաքապետի թեկնածուն:


Հիշեցնենք, նախօրեին Նաիրա Զոհրաբյանը Դավիթաշենում հայտարարել էր, որ որևէ ներդրող երբեք ներդրում չի անի մի երկրում, որտեղ անընդհատ հեղափոխական և հակահեղափոխական են փնտրում, որովհետև փողը սիրում է կայուն միջավայր, սիրում է վստահելի գործընկերներ: 


«Մենք այս վերջին տարիներին մեկ բանի դեմ ենք պայքարել, պայքարել ենք Հանրապետական կուսակցության մենաշնորհի դեմ, որպեսզի այլևս մեր երկրում որևէ քաղաքական ուժինը չլինի և’ խորհրդարանը, և’ կառավարությունը, և’ Երևանի քաղաքապետարանը: Եվ եթե կա քաղաքական ուժ, որը հիմա կփորձի ձգտել տոտալ վերահսկողության բոլոր իշխանական օղակներում, ուրեմն ես չեմ հավատա այդ քաղաքական ուժի անզվությանը, որ իրենց նպատակը սիրո և համերաշխության հեղափոխությունն էր: Պիտի լինեն տարբեր քաղաքական ուժեր, վերահսկող տարբեր կառույցներում, որպեսզի մենք կարողանանք միմյանց վերահսկել», - հայտարարել էր նա:

Տպել

Թեմայի այլ նորություններ
Загрузка...