Լավրովը կոչ է արել վերացնել Սիրիայի Իդլիբում ահաբեկչական «թարախակույտը»
Ռուսաստանի արտգործնախարար Սերգեյ Լավրովը կոչ է արել վերացնել Սիրիայի Իդլիբում ահաբեկչական «թարախակույտը»: Այս մասին նա հայտարարել է Սաուդյան Արաբիայի արտգործնախարար Ադել ալ Ջուբեյրի հետ բանակցություններից հետո, հաղորդում է ՏԱՍՍ-ը:
Նրա խոսքով, Մոսկվայում Թուրքիայի արտգործնախարար Մեւլութ Չավուշօղլուի հետ բանակցություններում զինյալների խնդրին այս տարածաշրջանում «առաջնային ուշադրություն» է դարձվել:
«Հասկանալի պատճառներով Իդլիբը ահաբեկիչների վերջին խոշոր օջախն է, որոնք փորձելու են շահարկել դեէսկալացիայի գոտու կարգավիճակը, քաղաքացիական բնակչությանը պատանդ պահել որպես կենդանի վահաններ եւ իրենց ենթարկեցնել զինված կազմավորումներին, որոնք պատրաստ են սիրիական կառավարության հետ բանակցություններին: Այսպիսով, բոլոր տեսանկյուններից, այս «թարախակույտը» պետք է վերացվի», - ասել է նախարարը:
Այս կապակցությամբ Լավրովը նշել է, որ անհրաժեշտ է «հրատապ առանձնացնել նորմալ զինված ընդդիմադիրներին ահաբեկիչներից» եւ միաժամանակ վերջիններիս դեմ Իդլիբում գործողություն նախապատրաստել, «անել ամեն հնարավորը` քաղաքացիական բնակչության համար ռիսկերը նվազեցնելու համար»:
Հենց այս տարածաշրջանում, ըստ ռուսական իշխանությունների, հատուկ պատրաստված զինյալները սադրանք են նախապատրաստում Սիրիայի կառավարության դեմ: Այդտեղ, ինչպես ավելի վաղ նշել էր ԱԳՆ-ն եւ Պաշտպանության նախարարությունը, նրանք պատրաստվում են քիմիական հարձակման բեմականացում իրականացանել, որը Արեւմտյան երկրները կարող են հետագայում օգտագործել Սիրիային հարված հասցնելու համար:
Նման սադրանքը, ինչպես նշել է Լավրովը, կապված է ԱՄՆ-ի ցանկության հետ՝ թույլ չտալ Իդլիբից հեռացնել Ռուսաստանում արգելված ահաբեկչական «Ջեբհաթ ալ Նուսրա» խմբավորման զինյալներին: Այս տարածաշրջանն այժմ Սիրիայում դեէսկալացիայի գոտի է:
Լավրովը հաղորդել է, որ Ռուսաստանի եւ Թուրքիայի զինվորականները խորհրդակցություններ են անցկացնում Սիրիայի Իդլիբում հնարավոր գործողության կապակցությամբ:
«Մի քանի օր առաջ Մոսկվայում, ինչպես գիտեք, ԱԳ, Պաշտպանության նախարարների, հատուկ ծառայությունների ներկայացուցիչների միջեւ բանակցություններ էին ընթանում, որի ժամանակ Իդլիբին հասկանալի պատճառներով հատուկ ուշադրություն էր դարձվել», — Սաուդյան Արաբիայի արտգործնախարար Ադել ալ Ջուբեյրի հետ ասուլիսից հետո ասել է Լավրովը:
