Մեզ համար անընդունելի է, որ հանքարդյունաբերությունը տնտեսության լոկոմոտիվն է. Փաշինյան

Հանքարդյունաբերությունը Հայաստանի տնտեսական աճի լոկոմոտիվն է: Դա փաստ է, բայց դա անընդունելի է մեր կառավարության համար: Կառավարության նիստի մեկնարկին այս մասին հայտարարեց ՀՀ վարչապետ Նիկոլ Փաշինյանը՝ նշելով, որ ձեռնարկվելու են բոլոր միջոցները հանքարդյունաբերության ոլորտի նկատմամբ ավելի մեծ վերահսկողություն սահմանելու, հանքարդյունաբերությունն ավելի որակյալ և պատասխանատու դարձնելու համար:

Վարչապետը նշեց, որ այսօր հանքարդյունաբերությունը Հայաստանի տնտեսական աճի հիմնական լոկոմոտիվն է, բայց կառավարությունը բազմիցս է արձանագրել, որ տնտեսական աճի այդ մոդելը որևէ կերպ չի կարող իրենց համար ընդունելի համարվել.

«Մեր կառավարության կարևոր խնդիրներից է փոխել տնտեսական աճի մոդելը ոչ միայն այն պատճառով, որ ուղղակի խոսքը տվյալ դեպքում վերաբերում է մեր ընդերքի վաճառքին, այլև այդ ընդերքի վաճառքից գեներացվող գումարների արդյունքում ձևավորված գումարների աճը ներառող չէ, այսինքն՝ այդ տնտեսական աճի ազդեցությունը իրենց վրա չեն զգում Հայաստանի հանրապետության քաղաքացիները: Պետք է հաստատենք շահագործման այնպիսի  կանոններ, որ հանրությունը իսկապես զգա՝ այդ ազգային հարստությունը օգտագործվում է այնպես, որ դրանից պետությունը և հանրությունը ստանում են այնքան օգուտներ, ինչքան պետք է իրականում ստանան», - ասաց Փաշինյանը:

Այնուհետ կառավարությունն ընդունեց հանքարդյունաբերության ոլորտի զարգացման հայեցակարգի կատարումն ապահովող միջոցառումների ցանկը հաստատելու մասին որոշում: