Գագիկ Եգանյան. 2600 ՀՀ քաղաքացիների վրայից հանվել է ՌԴ մուտքի արգելքը

Ռուսաստանի Դաշնություն մուտքի արգելք ունեցող 2600 ՀՀ քաղաքացիների համար որոշումը փոխվել է: Նրանց՝ ՌԴ տարածք մուտքի իրավունքը վերականգնվել է։ Այս մասին լրագորղների հետ զրույցում հայտնեց ՀՀ Պետական միգրացիոն ծառայության պետ Գագիկ Եգանյանը։

ՌԴ միգրացիոն օրենսդրության խստացումից հետո Հայաստանի ավելի քան 50-60 հազար քաղաքացիներ բարդ իրավիճակում են հայտնվել: Նրանք մեկնել են Ռուսաստանի տարածքից, հիմնականում գտնվում են Հայաստանում եւ չեն կարող հետ վերադառնալ այնտեղ, քանի որ խախտել են այդ երկրի միգրացիոն օրենսդրության պահանջները:

Ռուսաստանի միգրացիոն օրենսդրության խստացման հետեւանքով որոշակի խախտում թույլ տված քաղաքացիներին արգելվում է մուտք գործել Ռուսաստանի տարածք: Ըստ ռուսական աղբյուրների՝ ներկայումս ավելի քան 3 մլն մարդ հայտնվել է Ռուսաստանի օրենսդրական նորմերը խախտողների թվում: Նրանց նկատմամբ մինչեւ 10 տարվա արգելք կկիրառվի: Նրանցից ավելի քան 180 հազարը Հայաստանի քաղաքացիներ են:

Ավելի վաղ Եգանյանը հայտնել էր, որ Ռուսական կողմի հետ բանակցությունների արդյունքում համաձայնություն էր ձեռք բերվել, որ դեպի ՌԴ մուտքի արգելքի չեղարկման վերաբերյալ Հայատանի քաղաքացիների դիմումները համապատասխան փաստաթղթերի հետ միասին փոխանցվեն ռուսական կողմին: Ռուսաստանի միգրացիոն իշխանությունները համաձայնել էին վերանայլել այդ գործերը:

Այսօր Եգանյանը արդեն նշում է, որ այդ հարցով ռուսական կողմի հետ տարվող բանակցությունները հաջող են ընթացել։ «Մեզ դիմել է 9500 մարդ։ Նրանցից յուրաքանչյուրի հետ բացատրական աշխատանք է տարվել, ներկայացվել է անհրաժեշտ փաստաթղթերի ցուցակը։ Նրանցից շատերն անգամ չգիտեին, թե ինչ խախտումներ են թույլ տվել Ռուսաստանում։ Մենք փորձում ենք մեղմել այդ քաղաքացիների պատժի չափը՝ համագործակցելով ՌԴ պատկան մարմինների հետ։ Տարվա ընթացքում 9500 դիմումները մենք ուղարկել ենք ՌԴ», - ասաց Եգանյանը։