Երևանում բողոքի ակցիայի ցրման հետևանքով ոստիկանություն է տեղափոխվել 46 մարդ

Երևանի Բաղրամյան պողոտայում էլեկտրաէներգիայի թանկացման դեմ բողոքի ցույցի ցրման հետևանքով ոստիկանություն է տեղափոխվել 46 մարդ: Այդ մասին VERELQ-ի թղթակցին հայտնել է ՀՀ ոստիկանության մամուլի ծառայության ներկայացուցիչ Արմեն Մալխասյանը:

Նա պարզաբանել է, որ 46 ակտիվիստներից վեցը անչափահաս էին և նրանց անմիջապես ազատ են արձակել: Մնացած 40-ին ազատ կարձակեն մոտակա ժամերի ընթացքում:

Հիշեցնենք, որ ոստիկանությունը առանց բիրտ ուժ կիրառելու բերման է ենթարկել մի քանի տասնյակ ցուցարարների, որոնք չէին ցանկանում ենթարկվել իրավապահներին պահանջներին: Ցույցը ցրելուց և պողոտան ապաշրջափակելուց հետո, հայտարարությամբ է հանդես եկել Երևանի փոխոստիկանապետ Վալերի Օսիպյանը՝ նշելով, որ ոստիկանություն տեղափոխված քաղաքացիներն ազատ կարձակվեն: «Նրանց նկատմամբ գործեր չեն հարուցվելու, նրանք ազատ կարձակվեն»,-նշել է նա:

Մինչ այդ, Երևանի ժամանակով ժամը 12.30-ին ոստիկանության կողմից համապատասխան հայտարարություն է արվել, որ մոտակա ժամերին սկսվելու է Բաղրամյան պողոտայի ապաշրջափակման և երթևեկության վերականգնման գործողություն, որն արդեն երկու շաբաթ արգելափակվել էր էլեկտրաէներգիայի թանկացման դեմ հանդես եկող ցուցարարների կողմից:

Այս պահի դրությամբ, ոստիկանությունը շարունակում է պարեկություն իրականացնել Բաղրամյան պողոտայում, որն արդեն ամբողջությամբ ապաշրջափակվել է: Երթևեկությունը վերականգնվում է: