ՅՈՒՆԵՍԿՕ-ին չհաջողվեց նոր գլխավոր տնօրեն ընտրել. Բյուլբյուլ օղլին ընդամենը 2 ձայն է ստացել

Նախօրեին ՅՈՒՆԵՍԿՕ-ին չի հաջողվել ընտրել կազմակերպության նոր գլխավոր տնօրենի: ՏԱՍՍ հաղորդմամբ, առաջին փուլում առաջադրված թեկնածուներից և ոչ մեկը անհրաժեշտ աջակցություն չի ստացել: Երկրորդ փուլը տեղի կունենա այսօր:

Նշվում է, որ այսօր ՅՈՒՆԵՍԿՕ-ի խորհրդի 25 անդամ-պետություններ կհավաքվեն նոր նիստի, որպեսզի անցկացնեն ընտրության երկրորդ փուլը: Առաջին փուլի առաջատարը Կատարի ներկայացուցիչն է, թեև նրան էլ չհաջողվեց անհրաժեշտ քվոտան ստանալ: Առաջատարների թվում են նաև Ֆրանսիայի և Եգիպտոսի թեկնածուները: 

Ադրբեջանի թեկնածու, ՌԴ-ում Ադրբեջանի դեսպան Փոլադ Բյուլբյուլ օղլին քվեարկության ընթացքում ընդամենը երկու ձայն է ստացել:

Ծրագրվում է, որ խորհուրդն ընտրությունների հետ կապված բոլոր ընթացակարգերը կավարտի մինչև հոկտեմբերի 13-ը: