ԵԱՏՄ-ից դուրս գալու հարցը կքննարկվի ԱԺ-ում հաջորդ շաբաթ. Փաշինյան
ԵԱՏՄ-ին Հայաստանի անդամակցությունը դադարեցնելու մասին նախագծի վերաբերյալ եզրակացություն ներկայացնելու համար ԱԺ ժամանակավոր հանձնաժողով ստեղծելու մասին ԱԺ որոշման նախագիծը կքննարկվի ԱԺ լիագումար նիստում՝ հոկտեմբերի 3-ին։ Այս մասին տեղեկացնում է ԱԺ «Ելք» խմբակցության ղեկավար Նիկոլ Փաշինյանը:
Նրա խոսքով՝ քննարկումը կմեկնարկի ժամը՝ 12։00-ին:
Հիշեցնենք, երկու օր առաջ ԱԺ Արտաքին հարաբերությունների մշտական հանձնաժողովը մերժեց «Ելք» խմբակցության առաջարկը` ստեղծել ժամանակավոր հանձնաժողով և քննարկել Հայաստանի օգուտներն ու վնասները ԵԱՏՄ անդամակցությունից ու ըստ այդմ մեկնարկել միությունից դուրս գալու հարցը:
ԱԺ Արտաքին հարաբերությունների մշտական հանձնաժողովի 11 անդամներից միայն «Ելք» խմբակցության անդամ Արտակ Զեյնալյանը կողմ քվեարկեց. «Ելք»-ը տվյալ հանձնաժողովում միայն մեկ անդամ ունի: Հանրապետականը, ՀՅԴ-ն և «Ծառուկյան» դաշինքը դեմ քվեարկեցին առաջարկին: