ԱՄՆ-ն Իրաքյան Քուրդիստանի առաջնորդներին կոչ է արել հետաձգել անկախության հանրաքվեն

ԱՄՆ բարձրաստիճան դիվանագետը Իրաքյան Քուրդիստանի առաջնորդներին կոչ է արել հետաձգել անկախացման մասին հանրաքվեի անցկացումը։

ԻՊ-ի դեմ պայքարի միջազգային կոալիցիայում ԱՄՆ նախագահի հատուկ ներկայացուցիչ Բրեթ ՄաքԳերգը Էրբիլում հայտնել է, որ Բրյուսելը, Վաշինգթոնը, Փարիզը, Լոնդոնն ու Բաղդադը համատեղ մշակել են այլընտրանքային ծրագիր։

Չհայտնելով ոչ մի մանրամասներ այդ այլընտրանքի մասին, նա ասել է, որ այն ներկայացվել է քուրդ առաջնորդներին։ «Սեղանին կա այլընտրանք։ Որոշում կայացնելու ժամանակն է»,- ասել է ՄաքԳերգը։

Ավելի վաղ ԱՄՆ իշխանությունները կրկին հանդես էին եկել նման կոչով, որին ի պատասխան Իրաքյան Քուրդիստանի առաջնորդ Մասուդ Բարզանին հայտարարել էր, որ անկախության հանրաքվեի օրը չի փոխվելու: