Իրանը հայտարարել է Պարսից ծոցում ԱՄՆ-ի սադրիչ գործողությունների մասին

Իսլամական հեղափոխության պահապանների կորպուսը հայտարարել է Պարսից ծոցում ամերիկյան ռազմանավերի կողմից երկրորդ սադրանքի մասին։ Այս մասին հաղորդում է PressTV-ն՝ վկայակոչելով ԻՀՊԿ-ի հայտարարությունը։

«Նախօրեին տեղի ժամանակով մոտ 16։00-ին ԱՄՆ ռազմածովային ուժերի ավիակիրը, որին ուղեկցում էր ռազմանավը եւ որին հետեւում էին Իսլամական հեղափոխության պահապանների կորպուսի հածանավերը, մոտեցել է իրանական նավերին եւ «Ռեզալաթ» նավթագազային հարթակի մերձակայքում ուղղաթիռ օդ բարձրացրել»,-ասվում է հայտարարությունում։

Ընդգծվում է նաեւ, որ «ԱՄՆ-ն դիմել է սադրիչ եւ ոչ պրոֆեսինոալ քայլի՝ կրակոցերի միջոցով նախազգուշացնելով իրանական նավերին», սակայն իրանական նավերը շարունակել են կատարել իրենց առաքելությունը՝ «չնայած ամերիկյան նավերի ոչ ստանդարտ վարքագծին», որոնք ավելի ուշ լքել են տարածաշրջանը։