Կառավարության վավերացմանն է ներկայացվել ՀՀ և ՌԴ Միացյալ խմբավորման մասին hամաձայնագիրը

ՀՀ կառավարության վավերացմանն է ներկայացվել «Հայաստանի Հանրապետության և Ռուսաստանի Դաշնության միջև՝ Հայասատանի Հանրապետության զինված ուժերի և Ռուսաստանի Դաշնության զինված ուժերի զորքերի (ուժերի) Միացյալ խմբավորման մասին» hամաձայնագիրը վավերացնելու մասին ՀՀ օրենքը:

Այն ընդգրկված է կառավարության հուլիսի 20-ի նիստի օրակարգում:

Հիշեցնենք, հուլիսի 14-ին Ռուսաստանի Դաշնության Պետական դուման վավերացրեց նշված համաձայնագիրը: Այն ստորագրվել էր Մոսկվայում 2016 թվականի նոյեմբերի 30-ին և սահմանում է Միացյալ զորախմբի ձևավորման և կիրառման կարգը: Կարգավորվան ենթակա են նաև նյութատեխնիկական ապահովմանն ու տեղեկատվության փոխանակմանն առնչվող հարցերը:

Ավելի վաղ VERELQ-ը տեղեկացրել էր, որ Միավորված խմբավորման հիմնական խնդիրներին է վերաբերում ճիշտ ժամանակին ՌԴ-ի և Հայաստանի դեմ զինված հարձակման անմիջական նախապատրաստման բացահայտումը և դրա հակադարձումը, երկու պետությունների պետական սահմանների ցամաքային հատվածի փակումը պատասխանատվության հաստատված սահմաններում, օդատիեզերական տարածքում ՌԴ-ի և Հայաստանի պետական սահմանի պաշտպանությունը, ինչպես նաև զորքերի և տարածաշրջանում գտնվող երկու երկրների խիստ կարևոր օբյեկտների հակաօդային պաշտպանությանը մասնակցությունը:

Միավորված խմբավորումը կունենա միացյալ հրամանատարություն, դրա տեղակայման և կիրառման մասին որոշումը կայացվում է միասին՝ ՌԴ-ի և Հայաստանի զինված ուժերի գերագույն գլխավոր հրամանատարների կողմից:

Հիշեցնենք, համաձայնագիրը կնքվել է հինգ տարի ժամկետով՝ հետագա հինգամյա ժամանակահատվածներում դրա ավտոմատ երկարաձգման հնարավորությամբ: