Բաքուն ու Մինսկը պայմանավորվել են աջակցել միմյանց ԵԱՀԿ ԽՎ ամառային նստաշրջանում

Բելառուսն ու Ադրբեջանը պայմանավորվածություն են ձեռք բերել միմյանց աջակցել ԵԱՀԿ խորհրդարանական վեհաժողովի 26-րդ նստաշրջանի օրակարգի բոլոր հարցերում: ԲԵԼՏԱ-ի հաղորդմամբ, այս հարցը քննարկվել է Բելառուսի ներկայացուցիչների պալատի փոխխոսնակ Բոլեսլավ Պիրշտուկի և Բելառուսում Ադրբեջանի դեսպան Լատիֆ Գանդիլովի հանդիպմանը:

Պիրշտուկւ վստահություն է հայտնել, որ փոխգործակցությունը որակական նոր մակարդակ դուրս կգա: Հանդիպմանը նաև քննարկվել են երկու երկրների փոխգործակցության եզրերը միջազգային կազմակերպություններում, որտեղ Մինսկն ու Բաքուն մշտապես միմյանց աջակցել են: Նախանշվել է հուլիսի 5-9-ը Մինսկում կայանալիք ԵԱՀԿ ԽՎ ամառային նստաշրջանում համատեղ աշխատանքի ուղիները. զրուցակիցները պայմանավորվել են փոխհամաձայնեցված աջակցություն ցուցաբերել ամառային նստաշրջանի օրակարգի քննարկման ժամանակ:

Նշվում է, որ նստաշրջանը նվիրված է տարածաշրջանի խաղաղության և բարգավաճման համար փոխադարձ վստահության և համագործակցության ամրապնդմանը: Քննարկվելու է նաև ահաբեկչության սպառնալիքը, կիբերանվտանգությանը, երկարամյա հակամարտություններին, միգրացիային նվիրված հարցեր: