Քաղաքացիները կազատվեն վարկերի և ոչ բարեկամներից ստացված գումարների հայտարարագրումից

Կառավարությունը նոր նախագիծ է ներկայացրել, որն ազատում է քաղաքացիներին վարկերի և ոչ բարեկամներից ստացված որոշակի ֆինանսական միջոցների հայտարարագրումից:

ՀՀ ֆինանսների նախարար Վահե Հովհաննիսյանը Կառավարության նիստի ժամանակ ազդարարել է ֆիզիկական անձանց հարկային հաշվետվողականության համակարգի պարզեցման հերթական փուլի մասին:

Հիշեցնենք, որ ավելի վաղ գործընթացն էապես ավտոմատացվել էր. հարկային մարմիններն սկսել են ինքնուրույն նախալրացնել հայտարարագրերը՝ հիմնվելով առկա տվյալների բազաների վրա, իսկ ընտանիքի մերձավոր անդամների միջև ֆինանսական գործարքներն ամբողջությամբ հանվել էին հայտարարագրվող եկամուտների ցանկից:

Այժմ գերատեսչությունն անցել է ընտանեկան շրջանակից դուրս իրականացվող տրանսֆերտների կարգավորմանը:

Ներկայացված նախագծի համաձայն՝ սահմանվում են չհայտարարագրվող նոր շեմեր, որոնք կոչված են նվազեցնելու բնակչության վարչարարական բեռը։ Մասնավորապես, քաղաքացիներն այլևս ստիպված չեն լինի հայտարարագրել ստացված վարկային միջոցները՝ անկախ դրանց ծավալից: Բացի այդ, մեկ միլիոն դրամի սահմանաչափ է գործելու հայտարարատուի հետ բարեկամական կապ չունեցող անձանցից միանվագ ստացվող փոխառությունների, ժառանգության և դրամական նվերների համար:

Նույն մեկ միլիոն դրամի սահմանափակումը կկիրառվի նաև ոչ առևտրային կազմակերպություններից անհատույց ստացվող ակտիվների դեպքում։ Ակնկալվում է, որ այս միջոցառումները հայտարարագրման գործընթացը կդարձնեն առավելագույնս պարզ և հարմարավետ հարկատուների համար։