Թոշակառուների 2026-ից անկանխիկի հետվճարը կհասնի 20%-ի կամ 10000 դրամի

2026 թվականի սկզբից Հայաստանի կենսաթոշակառուներն ու նպաստառուները հնարավորություն կստանան զգալիորեն ավելացնել իրենց ամսական եկամուտը, քանի որ պետությունը որոշել է բարձրացնել անկանխիկ գործարքների դիմաց տրամադրվող հետվճարի չափը։

Աշխատանքի և սոցիալական հարցերի նախարարության փոխանցմամբ՝ հունվարի 1-ից գործող 12% հետվճարի փոխարեն կտրամադրվի մինչև 20%։ Այս փոփոխության արդյունքում քաղաքացիները կկարողանան իրենց կենսաթոշակը կամ նպաստը փաստացի ավելացնել մինչև 10,000 դրամով՝ նախկին 6,000-ի փոխարեն:

Ծրագիրն արդեն իսկ լայն տարածում ունի. նոյեմբերի տվյալներով դրանից օգտվում է ավելի քան 366 հազար քաղաքացի, իսկ մեկնարկից ի վեր շահառուներին որպես հետվճար վերադարձվել է մոտ 30 մլրդ դրամ:

Հարկ է նշել, որ պետությունը շարունակում է սոցիալական վճարների թվայնացման քաղաքականությունը, և 2026 թվականի ապրիլի 1-ից բոլոր պետական նպաստները, ներառյալ կենսաթոշակներն ու երեխայի ծննդյան նպաստները, կվճարվեն բացառապես անկանխիկ եղանակով։