Արգելափակվել են Hellobit ֆինանսական բուրգի կայքերը

ՀՀ ՆԳՆ կիբերոստիկանությունը միջազգային գործընկերների հետ համագործակցության արդյունքում հաջողությամբ կասեցրել է Hellobit ֆինանսական բուրգի առցանց գործունեությունը։ Իրավապահներին հաջողվել է արգելափակել կազմակերպության կողմից շահագործվող հիմնական հարթակները, որոնց միջոցով իրականացվում էր քաղաքացիների ներգրավումը։

Մասնավորապես, անհասանելի են դարձել hellobitamh.com և hellobitarmenia.com դոմենային հասցեները։ Ոստիկանությունից հայտնում են, որ այս օպերատիվ քայլը նպատակ ուներ կանխել քաղաքացիների հետագա մոլորեցումը և նրանց զերծ պահել ֆինանսական ծուղակում հայտնվելու վտանգից։ Այժմ նշված կայքեր մուտք գործելն անհնար է, ինչը էապես նվազեցնում է խարդախության զոհ դառնալու ռիսկերը։

Ավելի վաղ HelloBit ներդրումային հարթակում և նմանատիպ այլ նախագծերում հազարավոր դոլարներ կորցրած մի քանի տասնյակ քաղաքացիներ դիմում էին ներկայացրել Գլխավոր դատախազություն։ «Հանրային վերահսկողություն» ՀԿ-ի ներկայացուցիչները հայտնում են 250 գրավոր բողոքի և հանրապետության մասշտաբով առնվազն 17 հազար տուժածի մասին։

Քաղաքացիները պետական կառույցներին մեղադրում էին անփութության և անգործության մեջ, ինչը ֆինանսական բուրգերին գործելու հնարավորություն է տվել, ինչպես նաև պահանջում են հարուցել քրեական գործեր, քաղաքացիներին ճանաչել տուժող և պատասխանատվության ենթարկել այն պաշտոնյաներին, որոնք թույլ են տվել այդ սխեմաների ծավալումը: