Վայոց ձորի մարզը նոր ղեկավար ունի. մարզպետի պաշտոնը կստանձնի Վահագն Արսենյանը

Կառավարության այսօրվա՝ հոկտեմբերի 9-ի որոշմամբ, Վայոց ձորի մարզում կադրային փոփոխություն է տեղի ունենում։ Պաշտոնից կազատվի Կոլյա Միքայելյանը, որն այդ պաշտոնն զբաղեցնում էր մեկ տարուց էլ պակաս ժամանակ։ Մարզի նոր ղեկավար կնշանակվի Ջերմուկ համայնքի գործող ղեկավար Վահագն Արսենյանը։

Գործադիրի որոշմամբ Կոլյա Միքայելյանը, որը Վայոց ձորի մարզպետ էր նշանակվել 2023 թվականի դեկտեմբերին, կազատվի զբաղեցրած պաշտոնից։

Մարզի ղեկը կստանձնի Վահագն Արսենյանը, որը մինչ այս ղեկավարում էր նույն մարզի խոշոր համայնքներից Ջերմուկը։ Նա 2021 թվականի հոկտեմբերին վարչապետի որոշմամբ նշանակվել էր համայնքի ղեկավարի պաշտոնակատար, ինչից հետո նույն տարվա դեկտեմբերին կայացած ՏԻՄ ընտրություններում գլխավորել էր «Քաղաքացիական պայմանագիր» կուսակցության համամասնական ցուցակը և ընտրվել համայնքապետ։