Հայաստանը սկսել է ԱՄՆ-ի հետ «123 համաձայնագրի» շուրջ բանակցությունները

Հայաստանը և ԱՄՆ-ը պաշտոնապես մեկնարկել են խաղաղ նպատակներով միջուկային էներգիայի օգտագործման ոլորտում համագործակցությունը։ Այս մասին հայտնում է ՀՀ արտաքին գործերի նախարարությունը։

Բանակցությունները, որոնք նվիրված էին «123 համաձայնագրի» կնքմանը, նախատեսում են ստեղծել իրավական հենք՝ միջուկային տեխնոլոգիաների, տվյալների և փորձի փոխանակման համար՝ չտարածման միջազգային սկզբունքներին համապատասխան։ ՀՀ ԱԳՆ փոխնախարար Ռոբերտ Աբիսողոմոնյանը վերահաստատել է, որ միջուկային էներգիայի անվտանգ և խաղաղ օգտագործումը Հայաստանի համար առաջնային նշանակություն ունի։

Բանակցությունները դարձել են գործնական քայլ, որը հաջորդել է օգոստոսի 8-ին Վաշինգտոնում ՀՀ և ԱՄՆ կառավարությունների միջև փոխըմբռնման հուշագրերի ստորագրմանը։

«123 համաձայնագրի» կնքումը Հայաստանին և ԱՄՆ-ին թույլ կտա փոխանակվել առաջավոր միջուկային տեխնոլոգիաներով և գիտելիքներով, ինչը կնպաստի էներգետիկ անվտանգության ամրապնդմանն ու երկրում խաղաղ ատոմի զարգացմանը՝ միաժամանակ խստորեն պահպանելով միջուկային զենքի չտարածման բարձր չափանիշները։