Անշարժ գույքի շուկայում ակտիվությունը նվազում է. մայիսին գործարքները կրճատվել են 6%-ով

2025 թվականի մայիսին Հայաստանի անշարժ գույքի շուկայում գրանցվել է գործարքների զգալի անկում՝ թե՛ նախորդ տարվա, և թե՛ նախորդ ամսվա համեմատությամբ։ Այնուամենայնիվ, ամենաշատ գործարքները շարունակում են կատարվել Երևանում։

Անշարժ գույքի շուկայում այս տարվա մայիսին գրանցվել է 19 191 գործարք, ինչը 6.4%-ով պակաս է նախորդ տարվա մայիսի համեմատ, իսկ ապրիլի համեմատ անկումը կազմել է 6.7%։ Գործարքների ամենամեծ մասը՝ 29.8%, տեղի է ունեցել մայրաքաղաք Երևանում։

Առքուվաճառքի գործարքները կազմել են 4683, ինչը նախորդ տարվա նույն ժամանակահատվածի համեմատ նվազել է 1.5%-ով։ Դրանց մեծ մասը՝ 39.8%, վերաբերում է հողամասերին, իսկ 34.3%-ը՝ բնակարաններին։ Ամենամեծ անկումը գրանցվել է վարձակալության ոլորտում՝ կատարվել է ընդամենը 972 վարձակալության գործարք, ինչը 10.9%-ով պակաս է, քան անցյալ մայիսին։

Բազմաբնակարան շենքերի բնակարանների գներն այս տարվա մայիսին, ապրիլի համեմատ, նվազել են 0.3%-ով, մինչդեռ 2024թ. մայիսի համեմատ աճել են նույնքան՝ 0.3%-ով։ Ամենաբարձր գները շարունակում են պահպանվել Կենտրոն, Արաբկիր և Դավթաշեն վարչական շրջաններում։