ՀՀ ԶՈՒ-ում նախատեսվում են ստեղծել ԳՇ սերժանտի, կորպուսի սերժանտի, շտաբի սերժանտի պաշտոններ

ԶՈՒ-ում արհեստավարժ պայմանագրային զինվորական ծառայության ամբողջական կայացման նպատակով սահմանվում են բանակի՝ Գլխավոր շտաբի սերժանտի, կորպուսի սերժանտի և շտաբի սերժանտի պաշտոններ ու դրանց վարձատրության գործակիցները: Այդ մասին Ազգային ժողովի՝ ապրիլի 18-ի նիստին ասաց ՀՀ պաշտպանության նախարարի տեղակալ Արման Սարգսյանը՝ առաջին ընթերցմամբ ներկայացնելով ««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություն կատարելու մասին» օրենքի նախագիծը:

«Արևմտյան պետությունների, ինչպես նաև Արևելյան Եվրոպայի բանակների սերժանտական համակարգի ուսումնասիրությունը ցույց է տվել, որ գնդային մակարդակից բարձր սերժանտական համակարգը ներառում է գլխավոր շտաբի բանակային ուղղությունների և շտաբային սերժանտների առկայություն, որով նաև ապահովվում է սերժանտական համակարգի հրամանատարական ուղղահայացը»,- պարզաբանեց նախարարի տեղակալը:

«Հայաստան» խմբակցության պատգամավոր Գեղամ Մանուկյանն արձագանքեց՝ մինչև նախագծի երկրորդ ընթերցումը ԱԺ պաշտպանության և անվտանգության հարցերի հանձնաժողովում ԳՇ պետի տեղակալի մասնակցությամբ քննարկում է լինելու: Վերջինիս շրջանակում ներկայացվելու են սերժանտական ինստիտուտի ներդրման մանրամասները: Պատգամավորը տեղեկացրեց, որ խմբակցությունը ձեռնպահ կքվեարկի մինչև այդ քննարկումը տեղի կունենա: