Որո՞նք են գյուղատնտեսության զարգացման հեռանկարային ուղղությունները. քննարկում
Երևանում մեկնարկել է Կանաչ գյուղատնտեսության միջազգային կոնֆերանսը։ Այն նվիրված է կայուն զարգացմանը և կանաչ գյուղատնտեսության ոլորտում նպատակահեն հետազոտությունների խթանմանը։ Երկու օրերի ընթացքում աշխարհի տարբեր ծայրերից ժամանած միջազգային ճանաչում վայելող մասնագետները հայաստանյան իրենց գործընկերների հետ կքննարկեն կանաչ գյուղատնտեսությանը, ՀՀ-ում կայուն զարգացմանը, գյուղատնտեսության մարտահրավերներին, դրանց լուծմանն առնչվող հարցեր։
«ԵՄ կանաչ գյուղատնտեսության նախաձեռնությունը Հայաստանում» ծրագրի ղեկավար Պասկալ Բոկկերսը նշում է, որ կոնֆերանսը կազմակերպվել է ԵՄ աջակցությամբ «ԵՄ կանաչ գյուղատնտեսության նախաձեռնությունը Հայաստանում» ծրագրի շրջանակում, որն իրականացվում է Ավստրիական զարգացման գործակալության կողմից։ Համաժողովն արդյունավետ հարթակ է, որտեղ համախմբվել են ժամանակակից մոտեցումներ ներկայացնող ու գյուղատնտեսության ոլորտում պրակտիկ աշխատող մասնագետներ, որոնք գործնական կիրառումները կփորձեն կապակցել նորարար մոտեցումների հետ։
Պասկալ Բոկկերսի խոսքով՝ Հայաստանում առկա է գյուղատնտեսության լայն բազմազանություն՝ առևտրային, տնային տնտեսությունների մակարդակներում։ «Տարիների ընթացքում էական աճ է գրանցել առևտրային գյուղատնտեսությունը, և այժմ ժամանակակից տեխնոլոգիաների կիրառման կարիք կա, ինչը նաև թույլ կտա խնայել ռեսուրսներ։ «2004 թվականին, երբ նոր էի եկել Հայաստան, սահմանափակ թվով ծրագրեր կային այս ոլորտում։ Այժմ արդեն առկա է շատ մեծ բազմազանություն։ Կարծում եմ՝ զարգացման հեռանկարներ կան։ Մարդիկ հետաքրքրված են կանաչ արտադրությամբ, շրջակա միջավայրի համար շահեկան արտադրական մեթոդներով, ինչը ապագայում միմիայն կավելանա»,- ասաց Պասկալ Բոկկերսը։
Կոնֆերանսն իրականացվում է Հայաստանի ազգային ագրարային համալսարանի հետ համագործակցաբար։
Համալսարանի ռեկտորի պարտականությունները կատարող Հրաչյա Զաքոյանի խոսքով՝ կոնֆերանսը մեծ հնարավորություն է ուշադրությունը սևեռելու գյուղատնտեսության զարգացման հեռանկարային ուղղությունների վրա, համախմբելու ոլորտում փորձառություն ունեցող տարբեր մասնագետների, կատարելու փորձի փոխանակում և հետագայում համագործակցության լայն շրջանակում նպաստելու ոլորտի զարգացմանը։ Հրաչյա Զաքոյանն ընդգծում է, որ կոնֆերանսը միջազգային փորձը ներկայացնելու հարթակ է։ Նա շեշտում է, որ կանաչ ու կայուն գյուղատնտեսության շրջանակում տնտեսական գործունեությունը պետք է կազմակերպել՝ բնության օրինաչափությունները ճանաչելով և բարիք գործելու պրոցեսում չպետք է ստեղծել լուրջ խոչընդոտներ կամ անբարենպաստ պայմաններ բնության մեջ։
«Կանաչ և կայուն զարգացումն այսօր ամբողջ առաջադեմ մարդկության համար գերնպատակ է։ Եվ մենք պետք է այդ նպատակներին համաքայլ ընթանանք»,- ընդգծում է Հրաչյա Զաքոյանը։
Հայաստանի ազգային ագրարային համալսարանի հոգաբարձուների խորհրդի անդամ, դասախոս, կոնֆերանսի նախագահ և համակարգող Վարդան Ուռուտյանը նշում է, որ երկու օրերի ընթացքում կքննարկվի աշխարհում գոյություն ունեցող հաջողված փորձը, ինչպես նաև այն հնարավորությունները, որոնք կարելի է կիրառել գյուղատնտեսական քաղաքականության, կրթության և գիտության բնագավառներում՝ կանաչ գյուղատնտեսության զարգացմանը միտված գործողությունները խթանելու համար։ Ըստ պարոն Ուռուտյանի՝ այսօր շատ են կարևորվում նման հարակայուն գործելակերպերը, քանի որ աշխարհում արձանագրվում է կլիմայի փոփոխություն, հողերի դեգրադացիա, կենսաբազմազանության կորուստ։ Նշված պրոցեսները Հայաստանում նույնպես առկա են։ Եվ կոնֆերանսի նպատակն է բարձրաձայնել այս բոլոր խնդիրները, խոսել կլիմայի փոփոխությամբ պայմանավորված մարտահրավերների մասին, ինչպես նաև քննարկել, թե ինչպես կարելի է բարձր տեխնոլոգիաների ու նորարար լուծումների շնորհիվ զարգացնել Հայաստանի գյուղատնտեսությունն ու բարձրացնել դիմադրողականությունը, որպեսզի կարողանանք է՛լ ավելի ճիշտ դիմակայել մարտահրավերներին։
Կոնֆերանսի ընթացքում կներկայացվեն վերջին տարիներին ՀՀ գյուղատնտեսության ոլորտում իրականացված հետազոտություններ։ Կհնչեն մոտ 20 գիտական զերույցներ։ Մասնակիցները նաև դաշտային այցեր կկատարեն Զաբել Եսայանի անվան ագրոբիզնեսի կենտրոն և Կանաչ ուսուցման կենտրոն։
