Հայաստանի կառավարության՝ փետրվարի 27-ին նիստում հավանության արժանացավ Հայաստանի Հանրապետության և Ռուսաստանի Դաշնության միջև Ռուս-Հայկական համալսարանի (ՌՀՀ) գործունեության պայմանների մասին համաձայնագիրը, որը ստորագրվել է Մոսկվայում 2024 թվականի դեկտեմբերի 20-ին:
Այս համաձայնագիրը նպատակ ունի բարձրացնել համալսարանի կառավարման, կրթական և գիտահետազոտական գործունեության արդյունավետությունը, ինչպես նաև բոլոր գործընթացները համապատասխանեցնել երկու երկրների օրենսդրությանը: Թարմացված փաստաթուղթն արտացոլում է կողմերի ձգտումը՝ ամրապնդելու կրթական կապերը և կատարելագործելու բուհի աշխատանքը, որը կրթության ոլորտում հայ-ռուսական համագործակցության խորհրդանիշներից մեկն է:
Համաձայնագրի կարևորագույն նորամուծություններից մեկը դարձավ համալսարանի հիմքի վրա Հայաստանի, Ռուսաստանի և այլ պետությունների կրթական և գիտական կազմակերպությունների ամբիոնների և այլ կառուցվածքային ստորաբաժանումների ստեղծման հնարավորության վերաբերյալ դրույթի ներառումը: Սա նոր հեռանկարներ է բացում բուհի միջազգային ինտեգրման և նրա կրթական հնարավորությունների ընդլայնման համար:
Համաձայնագրում հատուկ ուշադրություն է դարձվել Ռուսաստանի Դաշնության բյուջետային հատկացումների հաշվին ուսուցման տեղերի բաշխման մեխանիզմին: Այս կետը կարևոր նշանակություն ունի հայ ուսանողների համար, որոնք ռուսերեն լեզվով կրթություն են ստանում ռուսական դիպլոմով՝ չլքելով իրենց երկրի սահմանները:
Փաստաթղթում առավել հստակ են ձևակերպված համալսարանի կառավարման սկզբունքային մոտեցումները, ինչպես նաև կիրառվել է կրթական ծրագրերի իրականացման հավասար մոտեցման սկզբունքը՝ երկու երկրների օրենսդրությանը համապատասխան: Սա թույլ կտա հավասարակշռել կողմերի շահերը և ապահովել կրթության բարձր որակ:
Զգալի փոփոխություններ են կատարվել ռեկտորի նշանակման ընթացակարգում: Համաձայն համաձայնագրի՝ ռեկտորն ընտրվելու է Կառավարման խորհրդի կողմից՝ համաձայն Կանոնադրության, և հաստատվելու է լիազորված մարմինների համատեղ հրամանով՝ մինչև 5 տարի ժամկետով: Կարևոր նորամուծություն է դարձել պաշտոնավարման սահմանափակումը. այժմ նույն անձը չի կարող զբաղեցնել ռեկտորի պաշտոնը ավելի քան երկու ժամկետ անընդմեջ:
Ռեկտորի հետ աշխատանքային հարաբերությունները կարգավորվելու են ռեկտորի և հայկական կողմից լիազորված մարմնի միջև կնքված աշխատանքային պայմանագրով, որը հանդես է գալիս որպես գործատու և գործում է համալսարանի հիմնադիրների անունից:
Որպես լիազորված մարմիններ հանդես են գալիս հայկական կողմից՝ Հայաստանի Հանրապետության կրթության, գիտության, մշակույթի և սպորտի նախարարությունը, իսկ ռուսական կողմից՝ Ռուսաստանի Դաշնության գիտության և բարձրագույն կրթության նախարարությունը:
