Ուսուցիչների աշխատավարձերը կբարձրանան. կառավարությունը հաստատեց նոր փոփոխությունները

Հայաստանի կառավարությունը հունվարի 6-ի նիստում հավանություն է տվել ուսուցիչների տարակարգերի և վարձատրության նոր համակարգին, որը կնպաստի մանկավարժի մասնագիտության գրավչության բարձրացմանը։ Նախաձեռնությունը ներառում է մի շարք կարևոր փոփոխություններ, այդ թվում՝ փաստաթղթերի թվայնացում և հավելավճարների հաշվարկման նոր մեխանիզմներ։

Ըստ ԿԳՄՍ նախարար Ժաննա Անդրեասյանի, վերջին չորս տարիներին կամավոր ատեստավորման արդյունքում ավելի քան 6100 ուսուցիչ արդեն ստանում է բարձր աշխատավարձ, ինչը կազմում է մանկավարժների ընդհանուր թվի մոտ 20 տոկոսը։ Հատկանշական է, որ 2023-2024 ուսումնական տարում դպրոցներում աշխատանքի են անցել շուրջ 3300 նոր ուսուցիչներ, որոնց 56 տոկոսը գյուղական դպրոցներում է։

Կառավարության ծրագրերը ներառում են նաև բնագիտական առարկաների և ՏՏ ոլորտի ուսուցիչների համար 25 տոկոս հավելավճար, որից օգտվում է 8200 մանկավարժ, ինչպես նաև գյուղական փոքր դպրոցների ուսուցիչների համար մինչև 50 տոկոս հավելավճար, որից օգտվում է 3100 ուսուցիչ։ 2024 թվականին այս ծրագրերի իրականացման համար հատկացվել է 8.9 միլիարդ դրամ։