Կառավարությունը սահմանել է զբոսաշրջային ընկերությունների համար նոր կանոններ

Հայաստանի կառավարությունը հաստատել է զբոսաշրջային գործունեության սուբյեկտների համար նոր կանոններ և պահանջներ սահմանող որոշման նախագիծը: Որոշումն ընդունվել է հունվարի 23-ի նախարարների կաբինետի նիստում:

Էկոնոմիկայի նախարար Գևորգ Պապոյանը բացատրել է, որ նոր կանոնները հստակ տարանջատում են զբոսաշրջային օպերատորների և գործակալների գործունեությունը՝ ապահովելով ծառայությունների որակը և հավասար մրցակցային պայմաններ ոլորտում:

Որոշման համաձայն՝ զբոսաշրջային օպերատորների ղեկավարները պետք է ունենան նվազագույնը երեք տարվա աշխատանքային փորձ ոլորտում կամ մասնագիտական կրթություն:

Առցանց ծառայությունների մատուցման դեպքում պահանջվում է բազմալեզու կայք՝ պարբերական թարմացումներով, որը պետք է պարունակի ընկերության մասին ամբողջական տեղեկատվություն, ներառյալ հարկային տվյալները և առաջարկվող զբոսաշրջային փաթեթները: