Կառավարությունը դասական աճուրդի կհանի Երևանի կենտրոնում գտնվող բարձրարժեք անշարժ գույքը

Հայաստանի կառավարությունը հունվարի 19-ին ընդունել է պետական գույքի օտարման որոշումների փաթեթ՝ դասական աճուրդների համակարգի միջոցով։ Օտարման ենթակա օբյեկտների ցանկում ներառվել են մայրաքաղաքի սրտում գտնվող բարձրարժեք հողատարածքներ։

Փաստաթղթերի համաձայն՝ աճուրդի կհանվեն Սուրբ Գրիգոր Լուսավորչի փողոցի 5/3 և 5/4 հասցեներում, ինչպես նաև Հանրապետության պողոտայի 85 հասցեում գտնվող հողատարածքները։ Հատկապես ուշագրավ է վերջին օբյեկտը, որի մեկնարկային գինը սահմանվել է 411,1 միլիոն դրամ։ Այս հողատարածքը պետության սեփականությունն է դարձել սնանկության դատարանի որոշմամբ և հաշվառվել է Պետական գույքի կառավարման կոմիտեի հաշվեկշռում։

Կառավարությունում ընդգծել են, որ աճուրդի հանվող բոլոր օբյեկտների մեկնարկային գինը կհամապատասխանի դրանց գնահատված արժեքի 100 տոկոսին, ինչը պետք է ապահովի առավելագույն օգուտ պետական բյուջեի համար։