«Սաշան առողջ է». Կարմիր խաչի ներկայացուցիչներն այցելել են բլոգեր Լապշինին

Կարմիր խաչի միջազգային կոմիտեի ներկայացուցիչները Բաքվում այցելել են Ռուսաստանի և Իսրայելի քաղաքացի Ալեքսանդր Լապշինին: Այս մասին հայտնել է նրա կինը:

Վերջինիս խոսքով, բլոգերն առողջ է և «ապրում է» նորմալ պայմաններում, առանց հարևանների: Ամենակարևորն, ըստ նրա, այն է, որ նրա ոգին չի լքել իրեն և ի տարբերություն այն օրվա, երբ նա ժամանել էր Բաքու, վերականգնվել է լավատեսությունը:

«Դա հիանալի է, քանի որ միայն այդպես է հնարավոր վերապրել այդ ամբողջ անհեթեթությունը»,- նշել է Եկատերինան:

ԿԽՄԿ ներկայացուցիչները տեղեկացրել են, որ առաջիկայում, հավանաբար, կհանվի Լապշինի կողմից հեռախոսազանգեր կատարելու արգելքը:

Միակ մտահոգությունը, որ հայտնել է Եկատերինան, վերաբերում է այն հանգամանքին, որ հետաքննության ընթացքը գաղտնի է պահվում: