Գործադիրը մարզերի ծրագրերի համաֆինանսավորման համար հատկացրել է ավելի քան 3 միլիարդ դրամ

Հայաստանի կառավարությունը հաստատել է երկրի 23 համայնքներում 46 սուբվենցիոն ծրագրերի ֆինանսավորումը՝ ընդհանուր 3,395 միլիարդ դրամի չափով։ Այս մասին հայտնել է տարածքային կառավարման և ենթակառուցվածքների նախարար Դավիթ Խուդաթյանը՝ ներկայացնելով 2024 թվականի մարզային բաշխումը:

Ամենամեծ ֆինանսավորումը կստանան Գեղարքունիքի մարզը (880,1 մլն դրամ՝ 9 ծրագրի համար) և Արագածոտնի մարզը (879,8 մլն դրամ՝ 5 ծրագրի համար): Հաջորդում են Կոտայքի մարզը (458 մլն դրամ), Շիրակի մարզը (447,2 մլն դրամ) և Արմավիրի մարզը (393,2 մլն դրամ):

Վարչապետ Նիկոլ Փաշինյանի խոսքով, այս ծրագրերի իրականացումն անմիջականորեն ազդում է քաղաքացիների բարեկեցության վրա։ «Երբ մենք ասֆալտապատում կամ սալարկում ենք ճանապարհը, բարձրանում է այդ ճանապարհի երկայնքով գտնվող բոլոր տների արժեքը: Պետական բյուջեից հատկացվող միջոցները դառնում են յուրաքանչյուր քաղաքացու ընտանեկան բյուջեի մասը», - ընդգծել է վարչապետը:

Նախարար Խուդաթյանի խոսքով, 2024 թվականին համայնքներին արդեն հատկացվել է 29,2 մլրդ դրամ պետական բյուջեից, և այս գումարը կարող է ավելանալ մինչև տարեվերջ:

Ծրագրերը ներառում են ճանապարհների ասֆալտապատում, ջրամատակարարման համակարգերի կառուցում, գազաֆիկացում, մանկապարտեզների վերանորոգում, փողոցային լուսավորության տեղադրում և այլ ենթակառուցվածքային աշխատանքներ երկրի տարբեր բնակավայրերում: