Գործադիրը հաստատել է 3 մլն դոլարի դրամաշնորհ` ուղղված դպրոցների սեյսմակայունությանը

Հայաստանի կառավարությունը դեկտեմբերի 13-ի նիստում հաստատել է Ասիական զարգացման բանկի հետ «Սեյսմիկ անվտանգության բարելավման ծրագիր» 3 միլիոն դոլարի դրամաշնորհային համաձայնագիրը։ Ծրագրի հիմնական օբյեկտը կլինի Արմավիրի մարզի Ոսկեհատ գյուղի միջնակարգ դպրոցը։

Նախագիծը նախատեսում է դպրոցի վերակառուցում, դպրոցական շենքերի պահպանման ուղեցույցի մշակում և 56 դպրոցների վարչական աշխատակիցների վերապատրաստում դրա կիրառման վերաբերյալ։ Նախատեսվում է նաև ուսումնական այց Ճապոնիա՝ սեյսմիկ ռիսկերի կառավարման, ճարտարագիտական լուծումների և կայուն քաղաքաշինության փորձի ուսումնասիրման նպատակով։

Հատուկ ուշադրություն կդարձվի 10-19 տարեկան 200 000 աշակերտների համար սեյսմիկ ռիսկերի վերաբերյալ իրազեկման ծրագրերի մշակմանն ու իրականացմանը։ Ծրագրով կառավարության պարտավորությունների ապահովման համար Հայաստանի տարածքային զարգացման հիմնադրամին հատկացվել է 19,8 միլիոն դրամ՝ Ոսկեհատի դպրոցի վերակառուցման նախագծանախահաշվային աշխատանքների ֆինանսավորման համար։