«Իմ համբերության բաժակը լցվել է». Փաշինյանը քննադատել է իրավապահ մարմինների աշխատանքը

Նոյեմբերի 15-ին կառավարության նիստում ՀՀ վարչապետ Նիկոլ Փաշինյանը կոշտ քննադատության է ենթարկել իրավապահ մարմինների աշխատանքը և հայտարարել երկրի ոստիկանական համակարգի մասշտաբային վերակառուցման մասին։

Նոյեմբերից Հայաստանի բոլոր մարզերում սկսել է գործել ոստիկանության նոր՝ եռաստիճան համակարգը։ Դրա կառուցվածքում ներառված են ծանր և առանձնապես ծանր հանցագործություններով զբաղվող քրեական ոստիկանությունը, մանր իրավախախտումներով և քաղաքացիների հետ փոխգործակցությամբ զբաղվող համայնքային ոստիկանությունը, ինչպես նաև պարեկային ոստիկանությունը։ Վարչապետը նաև հայտարարել է ոստիկանության գվարդիայի ստեղծման մասին, որը 2025 թվականի հոկտեմբերի 1-ից կդառնա ոստիկանության զորքերի իրավահաջորդը։

Կարևոր նորամուծություն է լինելու ուղղահայաց կառավարման համակարգի ներդրումը՝ բոլոր նոր ստորաբաժանումները ենթարկվելու են հանրապետական ոստիկանությանն անմիջականորեն, առանց մարզային աստիճանակարգության։

Հատուկ ուշադրություն է գրավել Փաշինյանի հուզական ելույթը, որում նա արտահայտել է իր խիստ դժգոհությունը իրավապահ մարմինների աշխատանքից։ Չնայած իրավապահ համակարգում զգալի ներդրումներին, ներառյալ աշխատավարձերի բարձրացումը, սարքավորումների և ավտոմեքենաների ձեռքբերումը, նոր կառույցների ստեղծումը, աշխատանքի արդյունքները մնում են անբավարար։

Կոռուպցիոներները, ըստ վարչապետի, շարունակում են վարել իրենց սովորական կյանքը՝ «առավոտից երեկո սրճարաններում քեֆ անելով», իսկ քաղաքացիները դեռևս ապրում են վախի մթնոլորտում, ինչպես նախկինում։

«Իմ համբերության բաժակը լցվել է»,- հայտարարել է Փաշինյանը՝ դիմելով դատական և իրավապահ մարմինների ներկայացուցիչներին։ Նա դժգոհություն է հայտնել, որ ուժային կառույցների միջոցառումներին իր ելույթներն ընդունվում են ծափահարություններով, սակայն չեն հանգեցնում իրական փոփոխությունների. «Ամեն տարի գալիս եմ նույն ելույթով, դուք ավելի ուժեղ եք ծափահարում... Ո՞վ է ում խաբում»։

Վարչապետը շեշտել է, որ իշխանության թուլությունն ուղղակիորեն կապված է իրավապահ մարմինների թուլության հետ։ Նա հայտարարել է վճռական միջոցներ ձեռնարկելու պատրաստակամության մասին և խոստացել, որ այս անգամ իր խոսքերը պարզապես խոսքեր չեն մնա։ «Ես այլևս ոչինչ չունեմ տալու։ Ամեն ինչ, ինչ խնդրել եք, տվել եմ»,- ամփոփել է Փաշինյանը։