Ոստիկանությունը դատախազության շենքի մոտից «բերման» ենթարկեց կալանավորի խրտվիլակին

Բագրատ Սրբազանը կեսօրից սկսած Գլխավոր դատախազության շենքի դիմաց ակցիա է իրականացնում՝ պահանջելով քրեական վարույթ հարուցել ՀՀ վարչապետ Նիկոլ Փաշինյանի նկատմամբ:

Մեկ ժամ առաջ նա ժամանակ էր տվել դատախազ Աննա Վարդապետյանին, որպեսզի նա իջնի ու բացատրություն տա, թե ինչու մինչ օրս Փաշինյանի արարքներին գնահատականներ չեն տրվել: Մասնավորապես, Բագրատ Սրբազանը Փաշինյանին մեղադրում է Արցախի ժողովրդի նկատմամբ էթնիկ զտման, ցեղասպանության հանցակից լինելու մեջ: Որոշ ժամանակ հետո դատախազությունից փոխանցեցին՝ պատրաստ են շարժման մի խումբ ներկայացուցիչներ ընդունել, առանց լրատվամիջոցների, ընդունարանում:

Դրանից հետո իրավիճակը լարվեց, երբ ակցիայի մասնակիցները շենքի մոտ բերեցին կալանավորի խրտվիլակ. քաղաքացիների ու իրավապահների միջև քաշքշոց սկսվեց, որից հետո ոստիկանները «բերման» ենթարկեցին կալանավորի խրտվիլակին:

"Ոստիկանությունը հմուտ կերպով ցույց տվեց, թե ինչ պետք է տեղի ունենա ապագայում։ Կալանավորի խրտվիլակին տարան, որի վրա գրված էր Արցախը հանձնելու թվականը, և դա նաև դատապարտության թվականն է",- ասաց Բագրատ Սրբազանը:

Այնուհետ շարժման իրավաբանը գրությունները՝ վարույթ հարուցելու պահանջով, փոխանցեց դատախազության աշխատակիցներին: