ԵԱՏՄ-ն կայուն զարգացման լավ օրինակ է, ՀՀ համար ԵԱՏՄ-ին անդամությունը շահավետ է և օգտակար

Հայաստանը իր տնտեսական գործընկերների շարքում ունի հարգանք և վստահություն: Սրանք շատ թանկ կատեգորիաներ են, որոնց հասնելու համար տարիների, նույնիսկ տասնամյակների աշխատանք է պետք: Այս մասին "ԵԱՏՄ-ի տասնամյակը և Հայաստանի տնտեսությունը. 2024 թվականի առաջին կիսամյակի հիմնական ձեռքբերումներն ու մարտահրավերները" թեմայով ասուլիսի ժամանակ հայտարարեց քաղաքական վերլուծաբան, Եվրասիական փորձագիտական ակումբի համակարգող Արամ Սաֆարյանը:

Նրա խոսքով, հարկ է, որ Հայաստանի իշխանությունները ջանքեր գործադրեն տնտեսական գործընկերների շրջանում Հայաստանի վարկը շարունակաբար բարձրացնելու ուղղությամբ.

"Պահպանելով ու զարգացնելով տնտեսական գործունեության ոլորտում ավանդական գործընկերների հետ կապերը, լրջագույն խնդիր է զարգացնել նոր կապեր և նոր ուղղություններ ժամանակավոր գործոններից ու պատահականություններից մեր տնտեսական օրգանիզմը առավելագույնս ապահովագրելու համար",- ասաց նա:

Արամ Սաֆարյանը վստահ է՝ ԵԱՏՄ-ն տալիս է կայուն զարգացման լավ օրինակ, իսկ Հայաստանի համար ԵԱՏՄ-ին անդամությունը շահավետ է և օգտակար: Այս իրողությունը Հայաստանի քաղաքական և հասարակական ուժերի շրջանում, կարծես, այլևս կասկածի տակ չի դրվում և անհարկի չի շահարկվում:

Կարևոր է նաև ընդգծել, որ մեր անվանի տնտեսագետ պրոֆեսոր Թաթուլ Մանասերյանը, մանրամասն վերլուծելով աշխարհր ամենատարբեր հեղինակավոր կազմակերպությունների և վարկանիշային հաստատությունների կանխատեսումները, արել է հերթական համարձակ կանխատեսումն այն մասին, որ 2024թ. արդյունքով հնարավոր է Հայաստանի տնտեսության աճ 8,5% և նույնիսկ ավելի: Նկատի ունենալով, որ վերջին տարիներին նրա բոլոր կանխատեսումները իրականացել են, այս եզրահանգումը պետք է որ հետաքրքրություն առաջացնի լրատվամիջոցների և փորձագետների շրջանում: