Ձեր նարատիվը, թե այս փաստաթղթի ընդունումը կլուծեր բոլոր խնդիրները, խաբեություն է. ՔՊ-ական

Ընդդիմությունը փորձում է մոլորության մեջ գցել իր համախոհներին՝ իրավիճակը ներկայացնելով այնպես, թե պատգամավորների արտահերթ նիստին մասնակցելը պարտավորություն է, ոչ թե իրավունք։ Այս մասին այսօր հայտարարեց «Քաղաքացիական պայմանագիր» խմբակցության ղեկավար Հայկ Կոնջորյանը։

Նա ընդդիմադիր պատգամավորներին հիշեցրեց, որ իրենք երկար ժամանակ օգտվել են այդ իրավունքից և բոյկոտել են նիստերը՝ աշխատավարձ ստանալով։ "Հիմա ի՞նչ, Ձեզ պետք է մեղադրենք, որ երկար ամիսներ զբաղված եք մակաբուծությամբ, քանի որ բոյկոտել եք խորհրդարանական նիստերը, հա՞»,– ասաց Կոնջորյանը։

ՔՊ խմբակցության ղեկավարը զարմանք հայտնեց հրավիրված արտահերթ նիստի օրակարգի վերաբերյալ.

«Կառավարության մոտալուտ հրաժարականի մասով այնքան պաթոս կա, այնքան հայտարարություններ, որ վարչապետի թեկնածու ունեք, որ ունեք անհրաժեշտ ստորագրությունները դիմում ներկայացնելու, որ մեր կուսակցությունից պատրաստ են աջակցել ձեր նախաձեռնությանը, բայց ի վերջո հանդես եք գալիս կոչի նախագծով... Ուղերձի՞՞: Այս փաստաթուղթը իրավական ուժ չունի, նույնիսկ եթե ընդունվի»։

Կոնջորյանը վստահ է, որ եթե ընդդիմությունը պարզապես ոտքի կանգներ և աղոթեր կառավարության հրաժարականի համար, ապա այն ավելի շատ քաղաքական կշիռ կունենար դրված նպատակների համատեքստում, քան ներկայացված փաստաթղթի նախագիծը։

«Հետևաբար, ձեր այս նարատիվը, թե այս փաստաթղթի ընդունումը կլուծեր բոլոր խնդիրները, բայց ՔՊ-ն ամեն ինչ ձախողեց, իրականում խաբեություն է։ Դուք ուղղակի ստում եք մարդկանց»,- հավելեց նա։