Ամուսնության տարիքային նվազագույն շեմը առաջարկվում է սահմանել 18 տարեկանը

ՀՀ գործող օրենսդրությամբ ամուսնության տարիքը 18 տարեկանն է: Որոշ բացառություններով 16 եւ 17 տարեկանում եւս անձը կարող է ամուսնանալ:

Օրենսդրական նոր կարգավորմամբ պատգամավոր Ռուստամ Բաքոյանն առաջարկում է ամուսնության տարիքային նվազագույն շեմը սահմանել 18 տարեկանը՝ առանց բացառությունների, հանել բոլոր այն կարգավորումները, որոնք վերաբերում են վաղ ամուսնություններին եւ անչափահաս ամուսիններին:

Ընտանեկան եւ Քաղաքացիական օրենսգրքերում փոփոխություններ նախատեսող օրենսդրական փաթեթն ԱԺ պետական-իրավական հարցերի մշտական հանձնաժողովի նիստում քննարկման է ներկայացրել պատգամավոր Ռուստամ Բաքոյանը:

Հիմնական զեկուցողը նշել է, որ խնդիրը դեռեւս 7-րդ գումարման խորհրդարանում է ուշադրության արժանացել, իրականացվել են ուսումնասիրություններ, շահագրգիռ բոլոր կողմերի հետ կազմակերպվել են քննարկումներ եւ խորհրդարանական լսումներ:

Հանձնաժողովի նախագահ Վլադիմիր Վարդանյանը համոզմունք է հայտնել, որ օրենսդրական առաջարկն անհրաժեշտ քայլ է, բայց ոչ բավարար, քանի որ կան ավանդույթներ, որոնք օրենսդրական կարգավորումից դուրս են:

Պատգամավոր Ալխաս Ղազարյանը, կարեւորելով նախաձեռնությունը, հարակից զեկույցում խոսել է վաղ ամուսնության հետեւանքով աղջիկների առողջական խնդիրների մասին, կարեւորել հատկապես համայնքներում ամուսնության նկատմամբ վերաբերմունքի փոփոխությանն ուղղված իրազեկումը:

ՀՀ արդարադատության նախարարի տեղակալ Արմենուհի Հարությունյանը եւս կարեւորել է փաթեթի ընդունումը, նշել, որ սա առաջին քայլն է՝ ցույց տալու նաեւ պետության վերաբերմունքն այս երեւույթի նկատմամբ: «Պետությունն իր վերաբերմունքը պետք է արտահայտի այն հանգամանքի նկատմամբ, որ առնվազն չի խրախուսում երեխայի, մինչեւ 18 տարեկան անձի ամուսնությունը, բայց ինչպես կկառուցեն հարաբերությունները, դա իրենց կամարտահայտությունն է ինչպես մինչեւ 18 տարեկանը, այնպես էլ դրանից հետո»,- նշել է փոխնախարարը:

Առաջին ընթերցմամբ քննարկվող օրենսդրական փաթեթը ստացել է հանձնաժողովի դրական եզրակացությունը: