Հերթական անգամ արձանագրում ենք հաղթանակը. Սրբազանը՝ Փաշինյանի Սարդարապատ չգալու մասին

Բագրատ Սրբազանի առաջնորդությամբ երթը երեկ Երևանից ուղևորվեց Սարդարապատի հուշահամալիր և գիշերեցին այնտեղ:

Առավոտյան հայտնի դարձավ, որ Նիկոլ Փաշինյանը հուշահամալիր չի այցելելու և սա առաջին անգամ է, երբ երկրի ղեկավարը այս կարևորագույն օրով Սարդարապատ չի այցելի:

"Այդ մարդը հատել է բոլոր սահմանագծերը՝ և՛ իրավական, և՛ մարդկային, և՛ բարոյական։ Եվ այս օրը նրա այստեղ չգտնվելը դրա վկայությունն է։ Ես չգիտեմ՝ դա սեփական որոշում է, թե թելադրված որևէ տեղից, բայց փաստն այն է, որ այսօր այստեղ մենք ենք և այսօր դուք հերթական անգամ արձանագրում եք այն հաղթանակը, որ Սրբազան պայքարի բովով անցնում ենք",- անդրադառնալով Նիկոլ Փաշինյանի չգալուն հայտարարեց Բագրատ Սրբազանը:

Նա նշեց, որ Հանրապետության տոնը մենք նշում ենք մեր բոլոր ժամանակների ամենանվաստ ու ամենաանպատիվ շրջանում։ Բայց չպետք է ընկճվենք, հուսահատվենք ու նահանջենք. "Մեր տառապանքներն ու ցավերը, մեր կորուստները մղում են մեզ էլ ավելի մեծ սխրանքների: Այս օրերին փաստել եք, որ նույն Սարդարապատյան ոգին ունեք։ Դուք փաստել եք ասելով՝ ո՛չ ու ո՛չ և հազար անգամ ո՛չ անպատվությանը, նվաստացմանը, ստորացմանը, ստին, թշնամությանը, ատելությանը և ասել եք այո՛ ճշմարտության հաղթանակին, ասել եք այո՝ պատվին ու հայրենիքին",- ասաց նա։

Նշենք, որ այս պահին քաղաքացիները Սարդարապատից երթով շարժվում են դեպի Երևան: