Սերժ Սարգսյանը գաղտնազերծեց Հայաստանի ապագա վարչապետի անունը
Հայաստանի նախագահ Սերժ Սարգսյանը Հանրապետական կուսակցության նոյեմբերի 26-ի համագումարում հայտարարեց, որ եթե գալիք խորհրդարանական ընրտություններում իշխող ՀՀԿ-ն ստանա վստահության քվե եւ կազմի իշխանություն, ապա կառավարությունը շարունակելու է գլխավորել գործող վարչապետ Կարեն Կարապետյանը:
Սա առաջին անգամն է, որ Սարգսյանը բացում է փակագծերը եւ նշում ընտրություններից հետո ՀՀԿ-ից կառավարության պոտենցիալ ղեկավարի անունը՝ այսպիսով հանգուցալուծելով ապագա խորհրդարանական Հայաստանում գործադիրի ղեկավարի անձի շուրջ ձեւավորված ինտրիգը: Ավելի վաղ, նոր սահմանադրության ընդունումից հետո, Սարգսյանը խուսափում էր այս հարցին հստակ պատասխան տալ: Թեպետ մինչեւ սահմանադրական բարեփոխումները նախագահը հայտարարել էր, որ խորհրդարանական կառավարման համակարգի դեպքում նա չի ձգտելու զբաղեցնել ո'չ խորհրդարանի ղեկավարի, ո'չ էլ վարչապետի պաշտոնները:
Շաբաթներ առաջ ՀՀ նախագահ Սերժ Սարգսյանը դեռ
չէր բացառում, որ 2017 թվականի խորհրդարանական ընտրություններից հետո կարող է վարչապետ դառնալ: Հերթական ընտրությունները կկայանան արդեն նոր սահմանադրությամբ, որն առաջարկում է կառավարման խորհրդարանական մոդելի անցում: Այսինքն՝ երկրի կառավարման ղեկն անցնում է կառավարության ղեկավարին:
Հայաստանին նվիրված ֆիլմում, որը պատրաստել է «Ալ Ջազիրա» հեռուստաընկերությունը, առկա է Սերժ Սարգսյանի հետ հարցազրույցի մի դրվագ, որում լրագրողի հարցին, թե արդյո՞ք մտադիր է քաղաքական գործունեությունը շարունակել արդեն վարչապետի պաշտոնում, ՀՀ նախագահն ասում է.
«Ես կարծում եմ, որ դեռ վաղ է այդ մասին խոսել: Դա նույնն է, ինչ ձուկը ջրում՝ խոսես այն բաժանելու մասին: Ավելի առարկայական այս հարցին անդրադառնալու համար Հանրապետական կուսակցությունը դեռ պետք է ընտրություններում ստանա ընտրողների ձայների մեծամասնությունը»:
Այժմ էլ դեռ չեն կայացել ընտրությունները եւ ՀՀԿ-ն տեսականորեն կարող է չստանալ ձայների մեծամասնությունը, սակայն Սարգսյանը հստակ հայտարարում է, որ արդեն որոշված է Կարեն Կարապետյանի քաղաքական ապագան: Թե ինչ է փոխվել այս ընթացքում, որ ընտրություններից մի քանի ամիս առաջ նա հստակ նշում է ՀՀԿ ապագա վարչապետի անունը, դժվար է ասել: Միայն պետք է հիշեցնել, որ նախօրեին Կարեն Կարապետյանը եւ մյուս անկուսակցական նախարարները հերթով հայտարարեցին ՀՀԿ-ին անդամակցելու իրենց որոշման մասին:
