Ղարաբաղը Ադրբեջանի մաս ճանաչելուց հետո ՌԴ-ից պահանջները տեղին չեն. Զախարովա

ՌԴ ԱԳՆ խոսնակ Մարիա Զախարովան քննադատել է Հայաստանի վարչապետ Նիկոլ Փաշինյանի հայտարարությունները Արցախում ռուս խաղաղապահների մասին։

«Այն բանից հետո, երբ Հայաստանը ճանաչեց Ղարաբաղը որպես Ադրբեջանի մաս, Ռուսաստանի դեմ պահանջները կրկնակի անտեղի են թվում», - ճեպազրույցի ժամանակ ասել է Զախարովան։

«Լեռնային Ղարաբաղից ռուս խաղաղապահների դուրսբերման մասին փաստարկները բացարձակապես անհասկանալի են, հատկապես այնտեղ ստեղծված ծայրահեղ ծանր հումանիտար իրավիճակի ֆոնին։ Սա պարոն Փաշինյանի ցանկությո՞ւնն է։ Հայտնի է, որ խաղաղապահները կատարում են կարևոր գործառույթներ (գերիների փոխանակում, ականազերծում...): Իսկապե՞ս այդ ակտիվությունն ավելորդ է, անցանկալի Հայաստանի ղեկավարության տեսանկյունից, և նրանք ցանկանում են, որ այն չլինի։

Հայաստանի ղեկավարությունը հաճախ ոչ միանշանակ դիրքորոշում է ընդունում մի շարք առանցքային հարցերի շուրջ, սակայն ես կցանկանայի, որ այս հարցում երկիմաստություն չլիներ։ Որովհետև բառախաղը լավ տեղ չի բերում»,- ասել է Զախարովան:

Նիկոլ Փաշինյանը հուլիսի 25-ին մամուլի ասուլիսի ժամանակ անդրադարձել է հարցին, թե երբ ռուս խաղաղապահները կարող են լքել Արցախը։ «Լեռնային Ղարաբաղում ռուսական խաղաղապահ կոնտինգենտի տեղակայումը նպատակ ունի կանխել բնակչության ջարդը։ Եթե ​​Ռուսաստանը որոշի դուրս գալ Լեռնային Ղարաբաղից, կնշանակի, որ նման վտանգ այլեւս չկա։ Սա կնշանակի, որ Բաքու-Ստեփանակերտ երկխոսությունն արդյունավետ էր։ Եթե ​​վտանգը պահպանվի, ապա դժվար է պատկերացնել, թե ինչպես կարելի է որոշում կայացնել խաղաղապահներին դուրս բերելու մասին»,- ասել էր նա։