Սարգիս Խանդանյանը Ռումինիայում քննարկել է տարածաշրջանային անվտանգության մարտահրավերները
Բուխարեստում աշխատանքային այցով գտնվող ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանի գլխավորած պատվիրակությունը մայիսի 29-ին հանդիպումներ է ունեցել Ռումինիայի Սենատում:
ՀՀ ԱԺ պատվիրակությունը, որի կազմում ընդգրկված են ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը եւ Հայաստան-Ռումինիա բարեկամական խմբի անդամ Արսեն Թորոսյանը, հանդիպել են Արտաքին քաղաքականության հարցերի հանձնաժողովի նախագահ Տիտուս Կոռլատեանի եւ հանձնաժողովի անդամների, ինչպես նաեւ Սենատի եվրոպական հարցերի հանձնաժողովի նախագահ Վասիլե Դինքուի եւ հանձնաժողովի այլ անդամների հետ:
Սենատի արտաքին քաղաքականության հարցերի հանձնաժողովի նախագահ Տիտուս Կոռլատեանի հետ հանդիպման ընթացքում ԱԺ պատվիրակության ղեկավար Սարգիս Խանդանյանն ընդգծել է Ռումինիայի առանձնահատուկ դերը հայ ժողովրդի կյանքում` նշելով, որ Ռումինիան այն երկրներից էր, որ ապաստան տվեց ցեղասպանությունից մազապուրծ բազմաթիվ հայերի: Նա շեշտել է նաեւ Ռումինիայի առանցքային դերը Հայաստան-Ադրբեջան սահմանին ԵՄ քաղաքացիական դիտորդական խմբի տեղակայման հարցում:
Տիտուս Կոռլատեանն էլ մատնանշել է հայերի առանձնահատուկ դերը եւ մեծ ներդրումը Ռումինիայի քաղաքական եւ հասարակական կյանքում` ընդգծելով խորհրդարանում ազգային փոքրամասնությունների ներկայացուցիչ հայազգի պատգամավոր Վարուժան Փամբուկչյանի ակտիվ գործունեությունը:
Հանդիպման ընթացքում անդրադարձ է կատարվել տարածաշրջանային անվտանգության մարտահրավերներին, Լեռնային Ղարաբաղի հակամարտությանը եւ ստեղծված հումանիտար իրավիճակին, «Խաղաղության պայմանագրի» շուրջ Հայաստան-Ադրբեջան բանակցություններին, Թուրքիայի հետ հարաբերությունների կարգավորմանը: Կարեւորվել է այդ գործընթացներում ԵՄ ներգրավվածությունը: Կողմերն անդրադարձել են նաեւ Հայաստան-ԵՄ հարաբերությունների զարգացման հեռանկարներին:
Ռումինիայի Սենատի եվրոպական հարցերի հանձնաժողովի նախագահ Վասիլե Դինկուի հետ հանդիպման ընթացքում հանգամանորեն քննարկվել են միջխորհրդարանական համագործակցության ընդլայնման, ԵՄ նախագծերում Հայաստանի ներգրավման, տնտեսության, մշակույթի եւ կրթության ոլորտներում առկա ներուժի օգտագործման հնարավորությունները:
Ռումինիայի Սենատի եվրոպական հարցերի հանձնաժողովի նախագահ Վասիլե Դինկուն հույս է հայտնել, որ ԵՄ-ին կհաջողվի լուծումներ գտնել տարածաշրջանում կայուն խաղաղություն հաստատելու հարցում:
Հանդիպումներին մասնակցել է նաեւ Ռումինիայում ՀՀ արտակարգ եւ լիազոր դեսպան Սերգեյ Մինասյանը:
