Երևանում բացվեց «Նեմեսիս»-ի հերոսների հուշակոթողը. Ավինյանի ելույթը սուլոցներով ուղեկցվեց

Հայոց ցեղասպանությունից շուրջ մեկ դար անց Երևանի սրտում՝ Օղակաձև զբոսայգու չորրորդ հատվածում, հանդիսավորությամբ բացվել է «Նեմեսիս» գործողության հերոսների հիշատակը հավերժացնող աղբյուր-հուշակոթող:

Սողոմոն Թեհլիրյան, Արամ Երկանյան, Արմեն Գարո, Գրիգոր Մերջանով, Արա Սարգսյան, Ավետիք Իսահակյան, Հրաչ Փափազյան, Շահան Նաթալի, Հակոբ Մելքումով, Երվանդ Ֆունդուկյան, Միսաք Թորլաքյան, Արշավիր Շիրակյան, Արշակ Եզդանյան, Ստեփան Ծաղիկյան, Արտաշես Գեվորգյան, Պետրոս Տեր Պողոսյան. 1915թ. Հայոց ցեղասպանությունը կազմակերպած և իրականացրած երիտթուրքերի պարագլուխներից, ինչպես նաև 1918թ. Բաքվի հայերի ջարդի կազմակերպիչներից վրեժ լուծած հերոս հայորդիների պատմությանն այսուհետ սերունդները կծանոթանան նաև այս հուշարձանի միջոցով, որը հարգանքի տուրք, յուրօրինակ խոնարհում ու հայրենիքի հանդեպ պատասխանատվության պատգամ է:

Աղբյուր-հուշակոթողը տեղադրվել է Երևանի ավագանու որոշմամբ, քանդակի հեղինակն է ճարտարապետ Տիգրան Բարսեղյանը:

Հարկ է նշել, որ հուշակոթողի տեղադրման միջնորդությունը ներկայացրել էին Հայոց ցեղասպանության վրիժառուների ժառանգները:

Ուշագրավն այն է, որ բացմանը մասնակցեց Երևանի փոխքաղաքապետ Տիգրան Ավինյանը և հավաքվածները բավականին վատ նրան դիմավորեցին: Ավինյանի ելույթի ժամանակ մարդիկ սուլում էին, վանկարկում "Դավաճան", "Ձեզ էլ են դատելու", "Գնա Բանվորի արձանը բացի" և նմանատիպ բաներ: Սակայն Ավինյանն ավարտին հասցրեց իր ելույթը, որի մեխը այն է, որ դավաճանները միշտ էլ իրենց պատիժը ստանում են: