Կոչ ենք անում Ռուսաստանին կատարել իր պարտավորությունը. Ալեն Սիմոնյան

Լաչինի միջանցքում, ռուսական խաղաղապահ կոնտինգենտի պատասխանատվության գոտում Ադրբեջանի կողմից անցակետի տեղադրումը կտրականապես անընդունելի է, քանի որ դա 2020 թվականի նոյեմբերի 9-ի Եռակողմ հայտարարության 6-րդ կետի կոպիտ խախտում է։ Այս մասին Twitter-ի իր միկրոբլոգում գրել է ՀՀ Ազգային ժողովի նախագահ Ալեն Սիմոնյանը։

«Մենք կոչ ենք անում Ռուսաստանին կատարել իր պարտավորությունը՝ ապահովելով ադրբեջանական ուժերի դուրսբերումը Լաչինի միջանցքի անվտանգության ողջ գոտուց և ՄԱԿ-ի անդամ երկրներին, որոնք ունեն միջազգային անվտանգությունը պահպանելու մանդատ, արդյունավետ քայլեր ձեռնարկել դատարանի որոշումը կատարելու համար»,- գրել է Սիմոնյանը։

VERELQ-ը հիշեցնում է, որ նախօրեին Ադրբեջանը պաշտոնապես արգելափակեց Լաչինի միջանցքը՝ քայլեր ձեռնարկելով միջանցքում՝ ՌԴ խաղաղապահ զորակազմի պատասխանատվության գոտում անցակետ տեղադրելու ուղղությամբ: ՀՀ ԱԳՆ-ն  հայտարարեց, որ Ադրբեջանի զինված ուժերի կողմից իրականացված այս քայլը չի կարելի համարել Ադրբեջանի հերթական սադրանք անգամ․ այն իրապես 2020թ․ նոյեմբերի 9-ի եռակողմ հայտարարության հիմնարար դրույթներից մեկի աղաղակող խախտում է՝ միտված Լեռնային Ղարաբաղում էթնիկ զտումներ իրականացնելու և Լեռնային Ղարաբաղն ամբողջությամբ հայաթափելու իր քաղաքականության հետևողական իրագործմանը։ Նախորդ տարվա դեկտեմբերի 12-ից շինծու բնապահպանական պատրվակներով Լաչինի միջանցքի շարունակական ապօրինի արգելափակումը և այսօր արդեն ակնհայտ կեղծ և անհիմն պատրվակներով անցակետի տեղադրումը հենց այս ծրագրված քաղաքականության հետևողական իրականացման հերթական քայլերն են։

"Կոչ ենք անում Ռուսաստանի Դաշնությանն ի վերջո կատարել եռակողմ հայտարարության 6-րդ կետով ստանձնած իրենց պարտավորությունը՝ վերացնելով միջանցքի ապօրինի արգելափակումը և ապահովելով ադրբեջանական ուժերի դուրսբերումը Լաչինի միջանցքի ողջ անվտանգության գոտուց, իսկ միջազգային անվտանգության մանդատով օժտված ՄԱԿ-ի անդամ պետություններին հստակորեն արձանագրել Ադրբեջանի կողմից տարածաշրջանային անվտանգությունը խարխլող գործողությունները և գործուն քայլեր ձեռնարկել միջազգային բարձրագույն դատական ատյանի վճռի անվերապահ կատարման ուղղությամբ",- ասված է ՀՀ ԱԳՆ հայտարարության մեջ: