ԱԺ-ում ամեն ինչ կա, բացի ՀՀ և Արցախի շահերից. իսկ ընդդիմությունն ո՞ւր է

Խորհրդարանական ընդդիմությունն այսօր իր ԱԺ աշնանային նստաշրջանի մեկնարկը տվեց Ազգային ժողովի շենքից հեռու՝ հրավիրելով «Հայաստանի իրական օրակարգը. Հայաստան և Արցախ. անվտանգային ահագնացող սպառնալիքներ» քննարկումը:

Քննարկման մասին նախապես էր հայտարարվել, այնպես որ ընդդիմադիրների բոյկոտը նորություն չէր ու ոչ էլ զարմանք հարուցող: Այլ հարց է, թե այս անգամ որքան կտևի բոյկոտը և, ի վերջո, ե՞րբ կվերադառնան նրանք ԱԺ: 

ԱԺ «Հայաստան» խմբակցության պատգամավոր Իշխան Սաղաթելյանն իր ելույթում հայտարարեց, թե այս ԱԺ-ն ձևավորվել է 2020 թվականի պատերազմի պարտությունից հետո և պատմության մեջ էլ կմնա որպես նորանկախ Հայաստանի ամենախայտառակ գումարման Ազգային ժողովը։ 

«Մեծամասնության պատճառով իսպառ բացակայում է պետական ու ազգային շահը: Մինչ մենք այստեղ քննարկում ենք Հայաստանի համար կարևոր հարցերը, խորհրդարանում կրկես հիշեցնող էժանագին շոուն է ընթանում: Այսօր ԱԺ-ում ամեն ինչ կա, բացի Հայաստանի և Արցախի, հայ ժողովրդի շահերի պաշտպանությունից, ԱԺ մեծամասնությունը հրաժարվում է դեմ արտահայտվել օկուպացված Շուշիում ստորագրված թուրք-ադրբեջանական հռչակագրին։ Դրա համար հարկավոր է նրանց միայնակ թողնել թշնամուն սպասարկելու իրենց ընտրության մեջ. ՔՊ-ն Արցախը վաճառելու գործում միայնակ է»,- ասաց Սաղաթելյանը։

Այլ կերպ ասած, ընդդիմությունը շարունակում է պահել պատգամավորական մանդատները, իրենց իսկ ձևակերպմամբ,  պատմության մեջ ամենախայտառակ գումարման Ազգային ժողովից չհրաժարվելով, չհրաժարվելով, ըստ էության, նաև դրա դիմաց վարձատրվել։ Բայց որպես գործիքակազմ՝ հրաժարվում օգտագործել դրա ընձեռած հնարավորություններն ու ինչ-որ քննարկումներ կազմակերպում ԱԺ-ից դուրս ու հեռու: Թե ինչո՞վ այդ քննարկումները կարող են օգտակար լինել աղետի շեմին գտնվող պետությանը, այդ թվում և հայաթափվող Արցախին, դժվար է պատկերացնել, քանի որ վերջին ամիսների իրողությունները ցույց տվեցին, որ անգամ փողոցում տասնյակ հազարավոր մարդկանց բազմությունը, ըստ էության, ոչինչ չփոխեց. իշխանությունը շարունակում է իր օրակարգը կյանքի կոչել, Բերձորը, Աղավնոն ու Ներքին Սուսը հանձնվեցին, Փաշինյանը շարունակում է վստահ խոսել Ադրբեջանի և Թուրքիայի հետ հարաբերությունների կարգավորումից, իսկ "խաղաղության դարաշրջանում" ամեն առավոտը բացվում է սահմանին կրակոցների մասին լուրերով:

Ի՞նչ սպասելիք ունենանք խորհրդարանական ընդդիմության այս բոյկոտի ձևաչափից. հարցն, ըստ ամենայնի, հռետորականների շարքին է դասվում....