Համաներումը կտարածվի՞ «Սասնա ծռերի» վրա. Հանրային խորհուրդը քննարկում է, գլխավոր դատախազի թեկնածուն՝ խուսափում

ՀՀ գլխավոր դատախազի թեկնածու Արթուր Դավթյանը, ով այսօր Ազգային Ժողովում հանդիպումներ է ունեցել ԱԺ խմբակցությունների ներկայացուցիչների հետ, չի շտապում մեկնաբանել Անկախության 25-ամյակի կապակցությամբ համաներում հայտարարելու մասին լուրերը ու առավել ևս կանխատեսում անել, թե արդյոք համաներման ակտի դեպքում այն կտարածվի «Սասնա ծռեր» զինված խմբի անդամների վրա, թե ոչ:

ԱԺ-ում լրագրողների հետ ճեպազրույցում դատախազի թեկնածուն նախ հիշեցրեց, որ համաներման ակտ դեռ չկա: Ինչ վերաբերում է «Սասնա ծռերին», ապա նա նշեց, որ այն հոդվածները, որոնցով հարուցվել են քրեական գործեր և առաջադրվել են մեղադրանքներ, ունեն նաև խրախուսական նորմեր: Ավելին ասել նա հրաժարվեց՝ նշելով, որ իրականացվում է նախաքննություն, օպերատիվ լայնածավալ քննություն: Նաև խուսափեց «ահաբեկչություն» որակումից՝ ընդգծելով, որ այս պահին քրեաիրավական գործով դեռևս որպես ահաբեկչություն չունեն բնորոշաում տված:

Նշենք, որ նախօրեին ՀՀ Հանրային խորհրուրդն իր նիստում քննարկել է Անկախության 25-ամյակին ընդառաջ համաներում հայտարարելու հարցը, որը կտարածվի նաև հուլիսյան դեպքերի հետևանքով անազատության մեջ հայտնված անձանց որոշակի խմբի վրա: